المساعد الشخصي الرقمي

مشاهدة النسخة كاملة : إذا كان رب البيت بالدف ضاربا .. فما شيمة أهل البيت إلا الرقص!!


روائي
19-11-2010, 04:53 PM
ملاقات تتحدث عن احداث ومواقف وعبر راح انقلها لكم وتطل عليكم كل يوم جمعه . بس اليوم فيه قسمين فا راح نخليها اليوم وباجر.. بطرح جديد ومواقف جديده مختلفه عن المره الماضيه .. سواء كانت اجتماعيه او ثقافيه او تربويه... الخ
بقالب كوميدي ساخر وهادف ...

وراح نستعرض اليوم 8 مواضيع حبيت انقلها لكم واتمنى تحوز على اعجابكم واللي عنده راي مخالف يقوله وكما يقال " كلمه تستحي منها بدها " واهلا بالنقد .......

وطبعا كالعاده انا اختار عنوان يلفت الانتباه وتقرون المواضيع المندرجه تحته .. ومو معناه انه هالموضوع هو المميز والباجي هامشي ... وكل شي منكم واليكم والسلام عليكم وعليكم واحد! ههههههههههه من اولها ملاقه

عموما ماراح اطول عليكم خخخخخخ








الى ميدان ملاقــــــــــات ........


شباب وبنات الجامعه والتطبيقي ... ج2

شبابنا وبناتنا الحين بفترة الاختبارات الله يوفقهم ويحققون نجاح باهر ... ليش الشباب (الجامعه) على وجه التحديد يقزون بالشريعه !!! البعض طبعا
شاهد عيان ( اهم شي شاهد عيان) قال فيه شباب يروحون الشريعه وتحديدا صوب الحديقه يمرون وطبعا هالممر صار الصفا والمروا ( استغفر الله ) رايح وراد ذهابا وايابا حشه الدائري الخامس!! ويمر ويسلم على البنات يعني الاخ مسلم زين مره مرتين ردوا السلام وبعدها اسكتوا خلاص بالعربي مايبون يكلمونك !! والدعله الثاني داش مكتبة جابر المركزيه ورا بنت عالاساس يكلمها هي تقرا كتاب والاخ يعني ترا ثقافتي اجنبيه ماسك كتاب انجليزي ويقراه بالمقلوب !! ماشالله عليه ....
والاخت الثالثه تدور ورا دكتور شايب مسكين ريله والقبر شتبين فيه !! قالت احبه خو حبيلج واحد قريب من عمرج وخلي هذا عايش ايامه الاخيره لزوجته وعياله !!
والاخير هذا كسر خاطري بصراحه مسكين يلاحق البنت بين المصافط وهي معلقه بلاك بيري بارقبتها والله حسبالي جمجمة ياهل ! وتقوله بكل برود انت ماعندك بلاك بيري لاتكلمني !! ياسلام يعني اللي ماعنده هذا اللي مايتسمى يطلع متخلف ومايفهم شي .. ومسكين يترجاها وهي تقوله لاتحاول معاي اشتر بلاك بيري وكلمني! ومسكين ينتظر الاعانه على نار ويزيدون اهله جم دينار عشان يكمل فلوس البلاك بيري ويفوز بقلب حبيبة القلب
واخرتها يطلع البلاك بيري ماله اصلي وهي صيني بو 20 دينار والله ماتسوى هاالمذله!

اما التطبيقي فحدث ولا حرج! وبدايتنا مع كليتي الحبيبه " التربيه الاساسيه" فيه دكتور بنا بيته على ظهر
الطلبه ! قولو شلون؟ الحبيب حاطله بسطه وكل تقدير بمبلغ وقدره ....؟ طبعا ولا احتاج ياخذ قرض ولا شي
والطلبه مستانسين على شنو مادري !!!

وفيه حاله ثانيه غريبه جدا واثارت اشمئزازي وغضبي ! فيه طالب افريقي يقعد بين الطلبه ويفتن فيما بينهم ومره من المرات قعد بيني وبين صاحبي يسالنا عن اصولنا ولما عرف قال مايصير يازول! انت بدوي وهو حضري والحضر مايحبون البدو والعكس! قلتله ليش قالولك احنا من الخرطوم! ا عندكم العنصريه يازول مو عندنا احنا نحب بعض واللي يطيح بمشكله نفزعله قريب كان ولا غريب ومهما اختلفت اصولنا ومذاهبنا ومعتقداتنا نبقى قلب واحد وامنا وحده هي الكويت ....... نقد على حاله ومن يومها وانا طايح فيه تعليق كرهته حياته! ومره من المرات وانا داش القاعه وهو كان قاعد وحاط ايده على خده دعمت كرسيه وجني مادري ! خخخخخخ

والحاله الثالثه فهي نوعا ما بوليسيه بين طالب وطالبه وطبعا اهي تداوم بالشاميه ويوم اصفطت نزل الاخ من السياره ولا ويهه شكبره ذكرني في كرتون كنا نشوفه واحنا صغار اسمه وادي الامان والله جنه فرس نهر وهي مسكينه مسمسه وضعيفه يعني لويحطها تحت اباطه ويمشي محد يشوفها !!!! وطق الجام عليه وعطاها الرقم وهي خذتها بكل استحياء يعني ياناس هو اذاني شسوي مو بايدي مغلوبه على امري !! والله يوم شفتهم حسبالي دعايه حق فيلم الجميله والوحش !!!

ولاتشوفون القوائم وقت الانتخابات والله ولا انتخابات الكونجرس ! والمعامله vip وبس يخلص لاتعرفه ولا يعرفك !!! انا واحد كان يناديني والله وانا ماعرف اسمه ولا شايفه حتى وقعد يترجاني وحب راسي وجتفي عشان اصوت لهم !! وانا اقوله ماحبيت ريولي بعد وطقيت راسك بالارض وترجيتني خخخخخخخخ وصوت لهم وانحشت!!! والكورس اللي بعده طاح معاي بماده ولا جنه يعرفني تصدقووون!
وطبعا التجاري حدث ولا حرج ماني متكلم عنه والله يستر على الجميع و GOOD LUCK للجميــــــع

ونتمنى التوفيق للجميع ............ا

اذا كان رب البيت بالدف ضاربا.. فما شيمة اهل البيت الا الرقص !عنوان يعبر عن اللي راح اتكلم عنه وهو رب الاسره " الاب " والمفروض يكون قدوه حسنه للابنا فما بالك اذا الافتراض ماصار !!! تخييلوا اب يساعد عياله على الانحراف! فمثلا اذا اطلعوا الشباب يقزون يقولهم ضبطونا معاكم !! والله فيك الخير يا بابا !

واب ثاني بخييييل! كنت اتمشى بسوق وشفت باسكن روبنز طبعا ماقدرت اقاومه صيفا وشتاء حتى لو مريض اكل ... ماعلينا الموضوع مو موضوعي انا الحين ... موضوع الحبيب اللي ولده يبجي ويقوله بابا ابي ايس كريم والوالد يقوله لا هذا مو زين وشوي ويطقه ! جان يقوله انا رايح وانت خلك هني يعني الحقني غصب ! وعور قلبي وهو يطالع هالعالم ياكلون وهو يبلع لريجه جان اعطيه فلوس واقوله روح اشترلك اللي تبيه وشكرني وراح طاير لبوه وقاله بابا عمي عطاني فلوس والابو استانس وراح شراله عادي ونسى كلامه توه يقول مو زين !! يعني عادي من مال غيرك يشتري اللي يبيه ....

والاخ الثالث ولده ضايع بسوق المباركيه وولد الحجيه خخخخ مايدري عنه وتخيلوا حوالي الساعه ادور مع الياهل عن ابوه ليما لقيته الاهبل قاعد يفصل دشداشه ! والمصيبه انه مطوع يعني المفروض يكون حريص على ابنه ... وطالعني بنظرات حقيره جني خاطف ولده ... قلتله انت وينك عنه ماكنت تدري انه ضايع ؟ وخذا اولده وطلع ولا جنه احد تكلم ...... الحبيب داش عن انسام الخلف ولا هيا الحوطي مو خياط رجالي ساعه كامله تتكلم مع الريال عن التفصيل !

وصاحبنا رايح الصالون ومتكشخ والظاهر دقت عليه الصاحبه وبسرعه حاسب الريال وطااار السياره ونسى ولده داخل يحلق ! وانا دايما البطل اللي يتدخل في الوقت المناسب خخخخخخخخخخ


والحبيب لا انساه يقول حق عياله طقوا امكم هذي مو متربيه ! والله انت اللي مو متربي وطاح حظك

والاب العزيز نسيته المفروض اقوله في البدايه كا خير مثال وافتتاحيه ..... الحبيب يوصل بنته كل يوم الصبح الكليه ويشترط عليها انها تصور رفيجاتها اللي معاها وهو طبعا يشوفهم ويتنقى الاجمل ويضغط على بنته انها تعرفه عليها ولا يسويلها سالفه ويفضحها عند اخوانها .... لعن ابوك ماتستحي ولاتنتخي والله حسافه انك اب!

والله مصيبه اذا تحولت القدوه الصالحه لطالحه......

واعتقد انكم فهمتوا معنى البيت ولو انه الامثله بسيطه


بدلياتي !!!

طبعا كل انسان يقط خيط وخيط وكلام ماينفهم واحيانا يخونه التعبير ويقطه في مأزق من دون قصد .... انا بدلياتي مالها حصر واعتبر وكيل للبدليات بالشرق الاوسط ههههههههههههههههههه من كثر ماقط بدليات
وراح اقولكم ابرز بدلياتي اللي للحين الاهل والاصحاب يتذكرونها ويضحكون ... مره من المرات دق علي واحد من الربع وقالي طلال باركلي طبعا انا املق عليه اقوله باركلي ولا ديكارت خخخخخخخخ هذيل فلاسفه يقولي عن الملاقه ... اقوله ملاقه ولا ماحصلت لووووول ! اووووه طلال بسك عاد ... اي صج شعندك ؟ باركلي اشتريت سياره ! قلتله صج والله ؟ الف مبروك منك المال ومنها العيال !!!!!!!!!!!! وهو فصل وطاح على الارض من كثر الضحك ... ولا اقوله لا اقصد يعطيك شرها ويكافيك خيرها !!!! ( بيكحلها عماها ) والله يومها زعل وحسباله اني قاصد .... لوووول
والبدليه اللي ما انساها يوم كنت ادور على دلاقي وماني لاقيه وصرت افكر وين حطيته ..؟؟؟ جان يقولي ابوي طلال قول حق الخدامه تعطينا قلاصين ماي وانا قلتله حاضر وانا ماشي وشارد الذهن ودشيت المطبخ ولا اقول للخدامه : يا كانتي عطينا دلاقين ماي لو سمحتي خخخخخخخ!!! انا قمت اضحك على نفسي وهي تطالعني مندهشه ومو فاهمه شي ياكبرها عند ربي دلاقين ماي عاد ( ويع)
ومره جيت اسلم على معرس وخليت كل الكلمات التهنئه وشنو تتوقعون قلتله؟ قلتله نعيما متى حلقت ؟! خخخخخخخ والله فصل علي وقالي طلال وخر عني الله يخليك الحين يشوفوني اضحك ويقولون هالمعرس رقله روح لاتقط بدليه بعد ههههههههههههه وانا من بعيد اشوفه يسلم ويضحك مثل المينون!!
وبدليات وايد فيه بدليات وصخه قلته من غير قصد بس ماراح اقولها احتراما لكم ....... اللي يبني اقوله بيني وبينه فقط خخخخخخخخخخخخخخخ

مؤامره ضد........؟


قصيدة مؤامره ضد "فلان" اللي ماراح اذكر اسمه عشان مايزعل بس الكلام عليج ياجاره خخخخخخ
طبعا القصيده كتبتها ايام الثانويه .. وكان فيه واحد من الشباب يتطنز علي وايد ويعلق ... واخر ما سواه طلع على اشاعه بايخه ... فاحبيت انتقم منه بهالقصيده الشريره خخخخخخ
ووزعت القصيده على كل الشباب اللي بالمدرسه وكل ما مر يم ناس يأشرون عليه ويضحكون لما طاح على القصيده وقراها وراح يعني يبي يشتكي بالاداره ويوم شافوها اضحكو عليه وقالوله تصدق عاد البيت الاخير راكب عليك هههههههههههههههههههه

تقول القصيده :-

يمكن تكون مشكله صغيره بالنسبه لكم

لكنها مشكله كبيره بالنسبه لي

اللي هي وجود ..... الاهبل بمدرستكم

ليش تطالعون يمين ويسار؟ هذا هو بينكم

هذا .... هذا... ماعرفتوه برج ايفل

اللي الغباء براسه صاير جبل

كل الديناصورات انقرضت وماتت

الا ... مادري متى الله بياخذه ويموت!

غلطان من قال اللي بالجدر مايطلعه الا الملاس...

اللي بالجدر مايطلعه الا .... العبيط بو راس !
وسلامتكم وسلامة بو راس خخخخخخخ

والله فشلتونا !!!

شباب طول الباب ويمكن اطول بجم متر >قويه< المهم تخيلوا نازلين يغازلون بسوق شعبي واللهم الحمد على الاشكال اللي يشوفهم يقول حمارة القايله ووصيفاتها طالعين يتمشون ....!
وكل واحد مطول شعره لي كتوفه ولابسين هالدشاديش وريحة زيت دابر املا تفوووح من شعوره الله يهداهم خيسوا المكان.... وهالدشاديش المخصره وكل واحد رافع صدره تقول صدر قطو!
واحد فيهم دشداشته زرقه جنه حليب كي دي دي ...والثاني مادري شلون اوصف لونها ...والثالث معاقبها مسكينه الظاهر سنين او ربما قرون مادشت بالغساله كلها بقع ودبق حتى الشعره اللي يطيح ربى بدشداشته . وريحته الله لا يوريكم!! . لعن ابوك ديودرن بنص دينار واشكالهم مخزيه بين هالعوايل ومعيب انهم يمشون بينهم وين داش حضرتك؟ ولا يمشون كل واحد باتجاه زين السوق صغير وحتى ماكو شفاط نفس ياجماعه والله راح نموت من هالريحه !! انتوا شنو مو مسلمين وين النظافه يا امة الاسلام الله يفشلكم ... والمصيبه داشين يغازلون !! ويفتنون البنات بريحتهم اللي تركزت بالمكان والكل مسكر خشمه يا بمنديل او بغترته والحريم بالحجاب او الملفع
وواحد حاول يدق عالشرطه بس ماكو تغطيه !!
وراحت وحده من الحريم تشتكي عند السكورتي وقالتله طلعوهم نبي ناخذ راحتنا ... اذونا مايصير جذيه
رد وقالها دول اشكالهم مجرمين واكيد كل واحد معاه سكين بجيبه ! وماينلام الحبيب يبي يرجع لاهله سالم ... بس العتب على العقل مع الاسف ... والله يكافينا ويكافيكم ويكافي بناتنا شر هالوحوش ...

فضيحه الاوادم بمركز سلطان.....

كنت اتسوق بمركز سلطان واثارني صوت امرأه صوتها عالي ومزعج ومو مخليه احد ما حشت فيه ولا شهرت فيه حتى اقاربها تخيلوا حاشهم طشار .... تسولف مع وحده وتقول ( فلانه اي دريت انها تطلقت يقولج طاح عليها زوجها بفعل فاضح ) وبعدين قالت اعوذ بالله بعد ما افضحت بنت الناس قالت الله امر بالستر ! انتي خليتي فيها ستر وتعيب على وحده ( اي سوت عملية تجميل وطالعي خشمها صار اكبر من اول ) قلت بقلبي مو اكبر من خشمج اللي جنه جرس كنيسه ........
وتمشي بقسم الفواكه والخضره وتذوق العنب وتقول لا موشي وتقطه على الارض وتروح تاكل من الخضره ( ياخبله مو مغسوله ) وتقول لا لا خضرتهم هالمره مو طيبه وهذي سالفتها كل ماتمر عند رف وتمشي وتحش بخلق الله وتتلف حلال الناس وصوتها جنه بيرق حتى الناس انزعجوا منها والمحاسبين تلخبطوا بالحساب
بسبتها !
وما خلت ولد خال ولا عمه وحتى زوجها الله يعينه عليها ماسلم من لسانها والله راح يدش الجنه والسبب هي
طلعت احاسب وحضرتها للحين تسولف بالتلفون وعفيه لرصيد ماخلص ... حتى لو فواتير جان انفصل
ورايحه يمين ويسار وتحش وتنهش بلحم خلق الله لا ابركتن فيها والسامعين يقولون امين .....



وللحديث بقيه غدا بالقسم الثاني من ملاقات 2 مع موضوعين تحت عنوان
" صواريخ زوجين "

+


"نكت ومقالب مختاره "


انتظروني .......... :cool:.

ذكرى
06-12-2010, 02:10 PM
شكرا روائي امثله حقيقه وتحصل في حياتنا اليوميه

روائي
06-12-2010, 04:56 PM
العفو يا اختي ولاهنتي على المرور

فارس العنزي
07-12-2010, 05:01 AM
هذا اللي صاير بمجتمعاتنا الخليجية ، ما أقدر أقول إلا ( الله يعيننا ويصبرنا )
يعطيك العافية أخوي "روائي " بإنتظار " صواريخ الزوجين ".

روائي
07-12-2010, 09:17 AM
شكرا على المرور


تصدق والله نسيت هالموضوع


ههههههههه

انشالله انزله اليوم


لاهنت على المرور ومشكور علة التذكير