مد وجزر.. ج1 _قصة وسيناريو وحوار "روائي" [الأرشيف] - شبكة الدراما والمسرح الكويتية الخليجية

روائي

04-03-2011, 02:37 AM

مد وجزر

" قصة كفاح "

عام 1996

الحلقه الاولى

قصة وسيناريو وحوار

روائي

............................................

مشهد 1 داخلي ليل منزل كفاح

في بيت كبير جميل وهادئ و بينما كانت كفاح تحضر وجبة العشاء ... يسمع صوت نداء زوجها سالم..

سالم : كفاح .. كفاح .. وينج ياكفاح .. كفاح

كفاح لم تستطع سماع صوت زوجها لانها كانت منهكه بالعمل .. مما دفع زوجها لنهوض من فراشه رغم مرضه الشديد .. واثناء نزوله من الدرج يسقط على الارض .. ويستغيث ..

سالم : كفااح .. كفااح ..

كفاح سمعت الصوت وتجري مسرعه نحوه

كفاح : وي وي بو سحر شفيك؟ ليش قمت من الفراش الله يهديك ؟

سالم وهو يحتضر وانامله تلامس وجه زوجته .. وهو ينظر لها بحزن .. والدموع تملأ وجهه ..

سالم : مابي أموت قبل ماشوفج ..

كفاح تبكي ... وهي ممسكه بيده بقوة ..

كفاح : اسمله عليك ياحبيبي .. يعل يومي قبل يومك .. قوم ارتاح على الكرسي ..
كفاح تحاول مساعدة زوجها على النهوض .. وعند وقوفه على ساقيه يهوى بالسقوط.. ويموت

كفاح : اسملله عليك؟ بوسحر قوم؟ سالم .. سالم.. حبيبي رد علي .؟

كفاح تستلقي بقربه وهي تحصنه وتبكي بحراره ..

قطع مشهد 1

مشهد 2 بيت كفاح ليل عزاء النساء

مشهد النساء وهن يجلسن في العزاء ..

لقطه لكفاح وهي تبكي ..

لقطه لسحر وساره وحصه .. وهن ينظرن لوالدتهن .. ويتحدن فيما بينهن

سحر : هذي العيوز اذحت عمرها من البجي .. كلنا بنموت .. والله

ساره : أي منو راح يدللها بعد الوالد .. راح تعيش وحيده ..

حصة : أي بعد عاشوا عمرهم الحين هذا وقتنا واحنا اللي لازم نستانس .. وهي خل تنطر اللحظه اللي راح تلحق الوالد فيها ..

سحر تستهزء : أي والله .. عاد الوالد اكبر منها بجم يوم يعني حسبوا جم يوم باقي من عمرها ..

> يضحكن <

قطع مشهد 2

مشهد 3 داخلي ليل منزل جواهر غرفة النوم

مشهد جواهر وهي تلمع اظافرها .. وتضع الطلاء عليها .. يدخل زوجها ابو صالح .. وينظر اليها بغضب ويقول ..

بوصالح : انتي ماتستحين على ويهج ؟

جواهر تنظر لزوجها باستحقار : ليش ؟ شصاير؟

بوصالح : وتقولين شصاير .. ؟؟ انتي شنو من بشر .؟ اختج توفى زوجها بدال ماتوقفين معاها .. قاعده تصبغين بهالاظافر ؟؟

جواهر: اوقف معاها؟ ليش وهي من متى درت عني؟ عشان انا اوقف معاها .. وبعدين عندها بدال البنت ثلاثه .. يعني وجودي ماله معنى ..

بوصالح : لعن ابو دارج هذي اختج من لحمج ودمج ..؟؟ باجر راح تنسالين عنها؟ روحي لها يمكن هي بحاجتج الحين ؟؟ حسي يابنت الناس .. حسسيني انه عندج قلب ..

جواهر غاضبه : أووووووووووه انت من وين طلعتلي .. الله يخليك حط لسانك بحلجك واسكت ..

بوصالح يهز رأسه ويخرج من الغرفه وهو حزين

قطع مشهد 3

مشهد 4 داخلي نهار منزل كفاح الصاله

كفاح جالسه لوحدها بالصالة .. تتذكر زوجها سالم .. وتنظر اللي المكان الذي سقط فيه .. ويستحضرها الموقف .. وتذرف دموعها ..

يدخلن البنات الثلاثه .. يجلسن .. تنظر سحر لامها وتقول

سحر : يمه هالبيت لازم ينباع .. وكل واحد ياخذ حقه ,,

ساره : أي والله يايمه .. انا مخطوبه وبجهز نفسي .. شنو مهري 4 الألف مايسون شي ..

حصة : أي والله وانا وريلي نبي نأثث البيت ونصبغ ..

سحر : أي وانشالله اذا انباع البيت راح نأجرلج شقه صغيره ونحطلج خدامه ونمر عليج بين فتره وفتره ..

حصة : أي والله عدل كلامها ماراح ننساج ..ولانتخلى عنج

كفاح : ابوكم للحين عزاه ماخلص وانتوا تتكلمون بالفلوس؟ انتوا شنو؟ ماعندكم احساس ؟ ترا اللي ميت ابوكم مو عدوكم .. خافوا الله .. فلوسكم راح تاخذونها لاتخافون حقكم ماراح يضيع .. بس مو وقته الحين .. تبون الناس يستنقدونكم ؟

ساره : واحنا شعلينا بالناس؟

سحر : أي والله .. احنا شكو .. الناس راح يسولون اليوم وباجر يدورون لهم سالفه يديده

حصة : أي عدل كلام خواتي ..

كفاح تنهض غاضبه وتذهب لغرفتها .. وتغلق الباب .. وترمي بنفسها على السرير وتبكي ..

ينهضن الاشقاء الثلاثه ويتوجهن لغرفتها .. وتقوم سحر بضرب الباب بيدها وتقول ..

سحر : البيت راح ينباع وغصبن عنج .. رضيتي ولا مارضيتي مبيوع يعني مبيوع .. الفلوس لنا .. وخليج انتي عايشه بعالم الأحزان ,,.

كفاح تبكي والالم يعتصر قلبها .. ماذا تفعل؟ الى من تلجا بعد الله سبحانه .. زوجها توفي .. وبناتها لايرحمونها .. واختها لاتريدها .. من بقي لها في هذا العالم الموحش .. كثير من الاسئله راودتها ..

هل سوف تستسلم لبناتها وطلباتهن .. وتقوم ببيع بيتها اللتي عاشت فيه طوال حياتها مع حبيب القلب .. وصور فيه اجمل الذكريات .. حلوه ومريره ..
اذا حصل هذا الامر ماذا سوف يكون مصيرها ؟؟

كل هذا سوف تعرفونه بالحلقه الاخيره .. من مد وجزر