اسمحوا لي أصدقاء وصديقات المنتدى بهذا الزجل الحلمنتيشي
 

العيال كبرت /المغربي
يااهل الغربة... مشفتوش خيبتي...
جايه منين؟!!
طلعت أنا شُوربه... وفاكر بنتي...
بتاع سنتين!!
فاكر إنها لسه بترضع..
ورايح أجيب بمبر وعروسه..
لاجل ما آخد منها البوسه..
قولوا بوستين!!
جالي جواب من أم عيالي..
تقول مبروك...
يوم ستاشر...
"شوشو" خلاص حتتم حداشر...
يا نهار طين!!!
المحروسه كانت مفعوصه...
بس امبارح.. مش في سنين!!!
اليوم بقى سنه في الغربه يا ناس!!
ولا انا شارب دلو عجين؟؟!!
ناقص أنسى إني مخلّف...
وانسى كمان.. خلفت انا مين؟!!
جبت مرايا.. أشوف فيها نفسي...
واحد غيري واقف قدامي...
من الشايبين!!!
بكره البنت خلاص تتجوز...
وافضل أنا في الغربة حزين؟؟!!
اتفرج ويايا يا سي ميلص...
وتعالى وشوف خيبتي يا حسانين!!!




الشيخ زعبُلّه/ المغربي
الشيخ زعبُلّه.. رَش القُله..
وقال يا شقاكي
فكيهه جارتكوا...
ورا مصيبتكوا... بتتحداكي
فيه عمل اسود...
تحت العتبه.. إللي حداكي
علشان تبقي في عين البيه...
وشك يا اختي... زي قفاكي
قلت يا خبر اسود ومنيّل...
أعمل إيه؟.. قوللي ورسيني؟!
قال لي إيدك على ألف جنيه..
أرجّع جوزك... وتغديني
قلت الألف جنيه دي كتير..
قال لي خلاص...
عرض قفاكي يللا اوريني
بعت غويشتي..
وقلت له يللا يا سيدنا الشيخ..
وربنا يهدي جوزي ويهديني
قال لي عايز قرموط ومنقّط..
وبعين واحده ويبقى وحيد
وكتكوت أعرج ماشي يتنطط...
مركون جنب الحيط وشريد
وحمامه بني بنص لسان..
وريشها جديد
وعين عفريت ميكونشي كبير...
أحوّل ونشيط
وتقومي دابحه الكل في بير..
والدم في وشك يبقى كتير...
يرجع جوزك ليكي وسعيد
***
دخل البيه جوزها مذهول...
قال لها إيه ده يا أم الغول؟..
زعبّله عندي هنا في البيت؟!!
روحي طالقه وامشي على طول
وآدي حكاية الواد زعبّله...
خراب وطبول

أولاد الذوات / المغربي
"إيمي حبيبي".. الست مامته بتناديه...
جايبه لك يا حبيبي أخبار من باغي "باريس"
سيارة آخر موديل باعتها بابا..
بيقول لك ارمي التانية للناس الغلابه..
عشان يقولوا إننا.. أولاد ذوات
***
وانتي يا سوسو...
عغيس "عريس" يا روحي جاي لك..
جاي من أوغوبا..
معاه جواهر تسطلك..
ما انتي عارفاه..
"إيمي" ابن أونكل اسماعين..
صحيح تخين..
ودمه يُلطش أووه يا باي...
لكن فلوسه...
تخلي ألف دماغ تلين
***
أما انا.. فعامله بارتي أووه عليها..
عازمه كل اصحابي... وخصوصا "فكيهه"..
اللي قالت إن جوزي بتاع حشيش..
سوفاج فكيهه .. متختشيش..
أنا بابي كان راجل كبير...
وجوزي أصلا كان وزير...
ساب الوزارة واشتغل في "المخدرات"..
يوووه.. أأقصد يا روحي "الصادرات
ما هي الوظيفة النهاردة..
متأكلشي حتى عيش

عندك محاولات جيدة في الكتابة.
شكرا.

حللللللللللللللللللللللللوه يامغربي ذكرتي باركب الحنطور وتحنطر هههه يسلمو