[محمد العيدان]

نشرت حوارات هذه المسرحية برمضان سنة 1999بجريدة السياسة عن طريق مؤلفها الكاتب الكبير عبدالامير التركي عندما كان يكتب لهذه الجريدة وتتحدث هذه المسرحية عن تجاوزات اعضاء مجلس الامة وكان من المفترض ان تعرض سنة 1995 وان يقوم ببطولتها كل من الراحل خالد النفيسي بدور بو صالح والفنان الكبير سعد الفرج بدور بومجبل وسأنشر المشاهد تباعا انشالله ..


المشهد الاول :

بو مجبل : خلاص يابوصالح .. بنحجي بصراحة .. وبالكويتي الفصيح !!

بوصالح : نعم بنحجي حجي يجمد على الشارب .

بومجبل : الليلة بنصلع .. بنكشف روسنا وبنحجي واللي فيها . فيها .. شبيصير ؟؟

بوصالح : موصاير شي .. الديرة فالتوه وقول اللي عندك والقاصر انا بكمله تراني متروس . متروس بلاوي ولاني طاق الطار مقلوب

بومجبل : ومنهو اللي بيطق الطار مقلوب . احنا الحمدلله لا احنا وزرا ولا حنا نواب في المجلس .. طق الطار شغلتهم مهي شغلتنا

بوصالح : الطاسة ضايعة بهالديرة والله يستر ..

بو مجبل : وانت الصاج يا بوصالح الكل يذرع من صوب ..

بو صالح : يا بومجبل ماادري شقاعد يصير بالديرة ؟ الكل صاير حكومة .. والكل يجر فينا من صوب والكل يهددنا ويأمرنا .. واللي يسمينا الاغلبية الصامتة .. واللي يقول قوى الشعب العاملة والطبقة الكادحة والمحرومين واللي يامرنا بالمعروف وينهينا عن المنكر .. مادري شصار فينا ماادري ؟!

بومجبل : والحكومة وينها ؟!

بو صالح : الحكومة الصجية تقصد ؟

بو مجبل : اي الصجية عليك نور .

بوصالح : ساكتة ..

بو مجبل : والي متى بتسكت ؟!

بوصالح : والله ماادري .. والظاهر طاقها عقر بقر . وانا يا بو مجبل بقول للحكومة كلمتين .

بومجبل : بس كلمتين ؟!

بو صالح : كلمتين ماغيرهم ..

بو مجبل : دام كلمتين قولهم .. احنا بطينا الجربة .. اتفضل قول .. غرد

بوصالح : انا اقول يا انها حكومة تحكم وتوقف كل واحد عند حده .. يا انها تستقيل ..

بو مجبل : الله . الله . الله . يا هي قوية !!

بوصالح : احنا مااتفقنا بنحجي بألسنة اهل الديرة .. ومايقص الراس الا اللي ركبه !!


بو مجبل : يعني خلاص .. نكشف الراس ونتطاول على الحكومة ؟!

بو صالح : الحكومة وغير الحكومة ..

بومجبل : واكو غير الحكومة بعد ؟؟!

بو صالح : اي نعم ..

بومجبل : قصدك .. قصدك ؟!

بوصالح : عليك نور .. وصلت خير ..

بومجبل : عرفتهم . عرفتهم . قصدك هلي يوعدون ويصفصفون الحجي بالخيام .. ومن يوصلون ينسونا وينسون الحجي اللي قالوه ؟

بوصالح : قول بعد اللي اول ماانجحوا اقعدوا يتسابقون على كراسي الحكومة ؟ّ!

بومجبل : عرفتهم . عرفتهم .. اللي اول ماانجحوا هبوا بالسفر واشفطوا الميزانية .. وزادوا معاشاتهم ..

بو صالح : واجمعوا المعاشين .. التقاعدي والمعاش اليديد ..

بومجبل : يصير ؟؟؟!!

بوصالح : كل شي يصير لهم بس ..

بومجبل : يعني المهندس اذا تقاعد وبعد سنة رجع وزارته ياخذ معاش ؟!

بوصالح : لا ..

بومجبل : عيل ليش هم ياخذون معاشين ؟!

بوصالح : هم غير على راسهم ريشة ..

بومجبل : اذا هي رادة على الريشة .. كل واحد يركب ريشة ونصير شعب بو الريش ..

بو صالح : تراها طالت وهي قصيرة ..

بومجبل : ادري فيك انت تعرفهم وهو معروفين .. ادري .. ادري من تقصد ..

بوصالح : يبه اقصد المجلس .. تبيني اريحك واقولها .. مجلس الامة .. زين !!

بومجبل : المجلس ماغيره !!

بوصالح : اي ماغيره ..

بومجبل : اللي على السيف !!

بوصالح : اي نعم اللي على السيف وبجبلة ..

بومجبل : الله . الله بنحجي على مجلس الحجي ..

بوصالح : اي نعم .. بنتسابق معهم بالحجي

بومجبل : انا من رايي نغير الموضوع .. هذولة صايرين من حرك بلش .. وباجر بيقولون عنك سلطوي وقابض .. وبعدين لاتنس هم عندهم حصانة !!

بوصالح : وانا بعد عندي حصانة ..

بومجبل : وينها يا خلاف !!

بوصالح : الديمقراطية .. وحرية الرأي اللي كفلها الدستور .. والا الدستور بس لهم ؟؟ انا الليلة بفجر هموم الديرة كلها واللي فيها . فيها الى متى بنسكت ؟؟

بو مجبل : بوصالح اعقل .. وانا من رايي ماانكمل الكلام اللي اكتبه المؤلف .. وخلنا نغير الموضوع احسن لنا .. واحسن له .. مالنا خلق الجرجره والقيل والقال ..

بوصالح : بالحق بقول اكثر ..

بومجبل : خلنا نهدي شوي ..

بوصالح : مصخوها يا بو مجبل .. والناس ملت .. يوم يطلع لنا واحد منهم يصرح ويقول بيحجزون على نفطنا عشر سنين جدام .. وبعد يوم يطلع هو نفسه يصرح ويقول استثماراتنا الخارجية بخير ..

بومجبل : اهي بعدها لنا !!!

بوصالح : منهي ؟!

بومجبل : الاستثمارات الخارجية .. مو قالوا باقوها ؟!


بوصالح : مو كلها .. باجي منها الحجال !!





انتهى المشهد الاول .. وترقبوا المشهد الثاني

[بن عـيدان]

اجزم انه لو تم عرضها سوف تكسر الدنيا وتكون على شاكله دقت الساعه وحامي الديار

...

بأنتظار المشهد الثاني

[أحمد سامي]

يعجز لساني عن الوصف

سأختزل كلماتي لحين القراءة والتمعن ومن ثم الرد

[وهبي]

تسلم تسلم
بأنتظار المشهد الثاني

بو مجبل : الله . الله . الله . يا هي قوية !!.......... يبتها ييب (صج مالت سعد الفرج)هههه

[أمر]

مشكور يا بو أحمد على ابتداء بعرض المسرحية (قبل لا يكبر طيره) وعلى مشاهد يالله رح تشوقنا على عرض باقي المشاهد على الأقل تعرض الأعمال على المنتديات وتشوف النور

[محمد العيدان]

اشكر مروركم الكريم .. ولاشك حوارات هذا المشهد من المسرحية كأنها تتكلم عن واقعنا اليوم

[كيكي الحد]

شكرا لك يا بو احمد على عرضك لنا الحوار وتسلم

[شيماء]

شكراً لك..

وننتظر المشهد التالي..

[ملك فنون]

شيء فضييع وناطرين المشهد الثاني