[سـيـرة الـحـب]

**
اسمع قصة بو شلاخ
بو لسانين مثل المنفاخ

في الثانيه يشلخ شلخه
عيّار ماقط مل أو داخ

يتكلم بصوت عاجل (عاقل)
موزون مافيه أي اصراخ

حاط ريل على ريل في الميلس
والقاعدين كل واحد صاخ

وكل شوي يمسح شعره
او ينفض چتفه عن الاوصاخ

اجداده كانوا تجار
قضوا اعمارهم ف اسفار

ماخلوا أرض بعد الصين
مايابوا منها أخبار

وجده السابع اول من
ياب البحرين فلفل حار

او زوج عمة والده عالم
إطّيعه الجن وام حمار

أو عمه كان نوخذة مركب
تحت امره ألفين بحار

أو خاله كان اول واحد
في البحرين يشرب سيجار

والراديو أول ماطب
في بيتهم من غير افشار

أو عنده في البيت سيف مسنون
وارثه عن جده المغوار

او دقله من ايام لاول
مايبيعها ابألفين دينار

ساطرك لوح موب ساطر حيْ
استح على ويهك اشوي

الصمي اتشلخ منك
وانت صاحي موب هامك شي

لين سولفنه عن التمبه
صاحبنه كان في شبابه

اكبر لاعب في الديره
الناس زحمه على بابه

مره من قبل السنتر
سجل باليسره إصابه

أو مره شات كورنر ياب قول
والحارس شق اثيابه

أومره كان باقي دقايق
والجمهور على اعصابه

عزّم لا ياخذ قول
او يهجم مثل الدبابه

و فعلا سجل بس قولين
ويجوز غلطان ف احسابه

والناس شالوه فوق لجتوف
وطلعو به من البوابه

فن التمبه مايعرفه
غير بو شلاخ واصحابه

بو شلاخ كل شي يعرف
من اموال غيره يصرف

لو تطلبه سلة ارطب
في بُنك لشته ايروح يخرف

يزرع لك عنقيشه ألحين
وبعد شوي يجني ويقطف

ويقدر يتحجه يومين
من غير ما اعيونه تطرف

عين الدوبيه تنشف
و ريج بو شلاخ ماينشف

صباغ عود بس باليه
يتغير لونه و يكشف

عنتر ، بس في ساعة الضيج
ينسى رفجانه وينجف

ويچذب چذبة ما تنطاق
ويصير على رايه ويخلف

ساطرك لوح موب ساطر حيْ
استح على ويهك اشوي

الصمي اتشلخ منك
وانت صاحي موب هامك شي

الشلخ أصله نقص في الناس
ويدل على موت الاحساس

لين زاد عن حده اشويه
مايزول الا بقطع الراس

قرحة فوق اللسان ماتبين
واتخلي الواحد محتاس

مايحس الشلاخ ابها
واتطوف على اكبر طلماس

الشلخ في اول أمره
چذبه صغيره ماتنقاس


واشويه اشويه تكبر
مثل السوس ينخر في الساس