[كوكب الشرق]

السلام ورحمة الله وبركاته

في هذا الموضوع اود ان اعبر عن رايي بمسرحية الرعب الفكاهيه ( ليلة رعب ) واود ان اذكر سلبياتها وايجابياتها وتقييم اداء الممثلين وكل ما في العمل بعد انتهائي من مشاهدتها قبل ساعه في مسرح سينما غرناطه . واود ان اذكر الاحداث التي مررت بها منذ وصولي لباب المسرح الى خروجي من باب المسرح .

نبدأ بالموضوع :
في الساعه ال9 والنصف مساءً وصلنا الى مسرح سينما غرناطه انا ومجموعه من اقاربي لجضور مسرحية الرعب الفكاهيه ( ليلة رعب ) ولم تفتح ابواب المسرح الا في الساعه ال10 مساءً وموعد بدء المسرحيه الساعه ال10 مساءً ! للأسف الشديد ان التنظيم سيء جدا والمسرحيه لم تبدأ الا في الساعه ال10 والنصف مساءً .

وبدأت المسرحيه بصرخه قويه جدا ومن الصدمه القويه سقط الفشار (النفيش) من ايدي احد اقاربي وبدأ المشهد الاول بصراع بين الخير والشر (ابليس والأخيار) وحوار ساخن بين ابليس والاخيار وبمرور الاشباح بين ممرات المسرح وتخويف الجمهور وبايديهم الشموع المضيئه بالنار .

وبدأت المسرحيه بدخول الممثلين وهذا تقييمي لأداء الممثلين :
عبدالرحمن العقل : أداؤه جميل وحضور جميل واضاف الكثير والكثير للعمل المسرحي بخفة دمه وروحه المرحه واستهزاؤه بالجمهور بطريقه راقيه جدا وخروجه عن النص بشكل يخدم العمل بشكل كبر بالرغم اني ضد ان الفنان القدير عبدالرحمن العقل يقوم بتأدية هذا الدور البسيط الي حد ما .

باسمه حماده : ملكة العمل وسيدته وقامت بتأدية الدور بحذافيره واتقنته وعاشت الشخصيه بكل مراحلها وهي ملكة المسرحيه بلا مناازع .

عبدالعزيز المسلم : لا انكر انه كاتب ومخرج ممتاز ومن الدرجه الاولى وقام باضحاكي بالمسرحيه ولكن اداءه عادي جدا والبعض يقول انه سيء!!

هبة الدري : مبدعه واداؤها جميل جدا وعاشت الدور والشخصيه باللبس و التسريحه و المكياج والتصرفات واقل ما يقال عنها انها مبدعه!!

ضاري (عطنا عيديه) : له مستقبل جميل جدا وهو (فاكهة المسرحيه) بلا منافس وطفل جريء جدا ومبدع رغم صغر سنه!!

والممثلين الاخرين اداءهم اقل من عادي .

المسرحيه جميله جدا والفنان عبدالعزيز المسلم يعتبر في قمة الابداع في الكتابه والاخراج والمسرحيه بها الكثير والكثير من المواعظ والعبر وهي هادفه لابعد حد والاحداث تعيشك بجو التشويق والاثاره والرعب وكمية الرعب والكوميديا جميله جدا.

وانتهت المسرحيه في الساعه ال1 والنصف بعد منتصف الليل.

وبعد انتهائي من تقييم العمل وذكر شخصيات الممثلين في المسرحيه هيا بنا نذهب الى شخصيات الممثلين الحقيقيه وكيف تعاملو مع الجمهور والمعجبين بعد انتهاء المسرحيه وراء المسرح عند الباب الذي يدخل اليه الممثلين .

(اعتذر للجميع لأني ساتحدث باللهجه الكويتيه لاني اجد صعوبه في التعبير في اللغه العربيه)

وبعد ما انتهت المسرحيه رحنا لباب الممثلين على شان ناخذ صور تذكاريه ونسلم على الممثلين

اول فنان شفناه اهو الفنان القدير عبدالرحمن العقل وكل الي اقدر اقوله عن هالانسان انه راقي في تعامله ومتواضع ومحترم والابتسامه ما فارقت ويهه وصورت معاه وهذا الحوار الي دار بيننا :

انا : استاذ عبدالرحمن العقل ممكن صوره اذا سمحت؟؟؟؟
عبدالرحمن العقل : أفا عليك اكيد ممكن ليش مو ممكن (وصورنا الصوره)
انا : يعطيك العافيه على هالوقفه ومشكور وما قصرت
عبدالرحمن العقل : الله يعافيك وانتو جمهورنا تستاهلون كل خير وانت يعطيك العافيه عالحضور وما قصرت.
انا : الله يعافيك بس ممكن سؤال اذا سمحت ؟؟؟؟؟
عبدالرحمن العقل : تفضل
انا : بس ابي اعرف انت بالغزو كنت بالكويت ولا بره؟
عبدالرحمن العقل : لا والله كنت بره الكويت
وبعد هالسؤال تشكرت منه ويعطيه الف عافيه وما قصر وتركنا وهو مبتسم يحليله

وبعد عبدالرحمن العقل انتظرنا عند باب الممثلين وطلعت باسمه حماده وهي لابسه عبايه اسلاميه ومغطيه ويهها بالشيله مع انها كانت ملكة المسرحيه لكن افسدت تألقها بهالتصرف الباااااااايخ

وهذا الحوار الي دار بيني وبين هبه الدري :

انا : هبه ممكن صوره؟
هبه الدري : انشاالله بس اصور مع البنت
انا : يعطيج الف عافيه على هالوقفه
هبه الدري : الله يعافيك ومشكور وما قصرت

انسانه محترمه ومتواضعه بصراحه وما شفت منها الا كل خير


( ما دار بيني وبين المسلم )


وبعدما انتهينا من هبه الدري انتظرنا عبدالعزيز المسلم وفي ولد يقول ابي توقيعه لكن المنظم يقول انه رافض ينزل وعطني ورقتك اوديها له يوقعها

وطبعا طلع عبدالعزيز المسلم واتيمعو عليه اليهال وهذا الي قاله بالحرف الواحد وبكل غرور وقلة ذوق وتكبر ( وخرو وخرو والي يعافيكم انا تعبان من الساعه 2 وانا واقف علي ريلي ماني فاضي!!!!!!!)

واليهال يترجونه يبون يصورون

وهذا رده عليهم وبكل غرور ( يلا يلا بسرعه تراني مو فاضي )

وهذا الحوار الي دار بيني وبينه والي صار بالضبط

انا : شلونك استاذ عبدالعزيز
عبدالعزيز المسلم : حاقرني وساحب علي سيفون
انا : شلونك استاذ
عبدالعزيز المسلم : يا ولد الناس انت نايم وشبعان نوم انا من الساعه 2 واقف علي ريلي ومو فاضي لك اصور
انا : ومنو قالك اني باصور معاك انا ياي اسألك سؤال!!!!!
عبدالعزيز المسلم : حاقرني ولا يرد علي
انا : ممكن سؤال
عبدالعزيز وبكل غرور وتعالي : ايه اسأل اسأل منو قاضبك
انا : وين هيا الشعيبي عنك وليش ما قامت تمثل معاك
عبدالعزيز : ما راح تمثل معاي
انا : ليش وشنو السبب
عبدالعزيز المسلم : تبيني اناقشك الحين الساعه 2
انا : اي نعم ناقشني وعطني سبب
عبدالعزيز : ترى هيا الي مسوي روحك خايف عليها تصير لي (وبعدها حقرني ولا رد علي كلش)
انا : شهالمغرور هذا الحمدلله والشكر (والله وبصوت عالي وبويهها وبكل عصبيه حتى قمت اسبه بصوت عالي بعد ما مشيت عنه وحتى كنت بقوله ليكون انت حسين فهمي ولا عمر الشريف الي شايف روحك!!!!)

عبدالعزيز المسلم بصراحه ما انكر ان العمل كان ممتاز وجميل جدا وانا وايد عجبني لكنه افسد كل هالنجاح بغروره وتصرفه وقلة ذوقه!!! وانا لازم اميز بين المسرحيه وشخصيته وما ادخل شي بشي ثاني

وبصراحه عبدالعزيز المسلم طاح من عيني ومتحسف اني كنت ادافع عنه بالمنتديات وجدا ً متحسف اني ما عطيته ذاك الرد الي يأدبه ويسنعه

بانتظار اراءكم وتعليقاتكم واتمنى الي حضر المسرحيه يعطينا رايه فيها

اسف عالاطاله وشكرا

( بقلمي : كوكب الشرق )