27-09-2010, 03:10 AM
|
#18 (permalink)
|
| عضو شبكة الدراما والمسرح
العــضوية: 11046 تاريخ التسجيل: 28/08/2010 الدولة: EgYpt
المشاركات: 56
| 
Point Of View
اعذرني انا هرد عليك بدون اقتباس عشان اختصر مساحتي في بعض السطور اللي هقولهم
اولا لا داعي لاستخدام لقب استاذ .. انا عمري 22 سنه ولسه متخرج من الجامعه السنه اللي فاتت لسه بدرييي عشان اشيل لقب زي ده
وبالمناسبه انت فهمتني غلط .. انا اكتر واحد كنت بكره الحال اللي وصلتله الدراما المصريه تقريبا مكنتش بتفرج علي مسلسلات خالص - وده بغض النظر عن ظاهره النجم الاوحد للعمل وتكرار القصص ، الا اني لاهتمامي بالسينما كنت بعيب عليها رداءه اخراجها وسوء مستوي الصوره مقارنه بالدراما السوريه اللي ظهرت في ابهر صوره ليها من بدايه الالفيه
وبالتالي انا لحد 2009 كنت في حاله حزن علي الدراما المصريه ، وازاي احنا كمخرجين ومنتجين مش واخدين بالنا من المقارنه اللي لو اتعملت مع الدراما السوريه او التركيه مش هتكون لصالحنا
لكن زي ما قلتلك في 2010 الوضع ابتدي يختلف .. اكتر من 10 مسلسلات من اصا 60 مسلسل مصري كان فيهم تغيير جذري في مجال الصوره والقصه والموضوع وده مؤشر لعدد اكبر في السنين المقبله ان شاء الله
بالنسبه لاسئلتك
- المجال الفني في سوريا مختلف عنه في مصر ، ان المخرجين الموهوبين او المتميزين في مصر دايما بيحبو يشتغلو في السينما وبيبسيو الاخراج الدرامي للمخرجين التليفزيونيين المعروفين باستخدامهم للتقنيات الكلاسيكيه القديمه في التصوير او للمخرجين اللي فشلو يلاقولهم وظيفه في السينما لضعف قدراتهم فلقو مجال التليفزيون ادامهم
اما في سوريا فالمخرجين العمالقه امثال نجدت انزور و حاتم علي ومحمد عزيزيه وغيرهم فالمجال الوحيد اللي ادامهم هو الدراما السوريه ، وهو مجال ضيق بالنسبه لحجمهم بصراحه .. واحد زي نجدت انزور او حاتم علي لو فيه سينما في سوريا مكانش بقي اقل من يوسف شاهين او مصطفي العقاد رحمهما الله
الفرق جه من هنا .. ولكن السنه دي لو بصيت علي المسلسلات الناجحه في الدراما المصريه هتلاقي ان اغلب مخرجينها من الشباب بما معناه ان فيه تغيير جذري في جيل المخرجين في الدراما المصريه .. اسماء مبشره زي محمد علي ، سميح النقاش ، هاله خليل ، حسني صالح ، غاده سليم وغيرهم .. بينما شيوخ المهنه من المخرجين اللي عفا عليهم الزمن مسلسلاتهم فشلت حتي في الظهور في رمضان علي قنوات التليفزيون الحكومي في اوقات مناسبه امثال اسماعيل عبد الحافظ
- باب الحاره انا كنت من اشد معجبيه وتابعته في الجزء التاني والتالت وكان فيه حاله متابعه رهيبه ليه عندي في البيت خصوصا من الوالده ، لكن باختفاء ظهور عباس النوري وتتابع اجزاء المسلسل بشكل غريب حتي الجزء الخامس وقريبا السادس المسلسل بقي شعارات ممله بالنسبه لي علي الاقل .. مفيش جديد علي المستوي الفني ، نجاح العمل اصبح جماهيريا وبس
وحتي لا تتهمني بالعنصريه ، فاصلا المسلسلات اللي بتدشني في المتابعه هي المسلسلات المصريه/السوريه زي سقوط الخلافه العام ده ، والمسلسل اللي اتنبا ليه بنجاح باهر فني وجماهيري ان شاء الله <محمد علي> تمثيل مجموعه من النجوم والممثلين في مصر وسوريا واخراج المخرج السوري المختلف حاتم علي
وفي الاخر انت كمشاهد ليك حريه النقد واختيار نوعيه المسلسل اللي بيعجبك
بس انا كان كلامي اللي فات من الناحيه الفنيه ومش من وجهه نظر مشاهد مصري
|
|  |
العرض الشجري
المواضيع المتشابهه 
