[محمد العيدان]

http://www.alanba.com.kw/AbsoluteNMN...2947&zoneid=15


العادة أي صحافي يبي يسوي لقاء مع فنان أو مطرب يدق عليه تلفون أو يتواعد معاه بمقر الجريدة أو بأي مكان، الا في هذا اللقاء الاستثنائي كان المكان غير والحوار غير والنقاش خارج عن العادة.
الموعد: أمس الظهر.
المكان: القادسية.
الوقت: ساعة الغدا مع الأهل والخلان.
الفنان: محسوب علي أخو.
أي شفيكم أخوي من أبوي أهو اللي سويت معاه الحوار وهو نفسه الفنان.
واحد يقول اشدعوة امضبط اخوك بهالحوار:
حشى والله اهو الوحيد اللي بالفن انتقده أهو الوحيد اللي ما يعجبني معظم شغله برأيي كسلان.
وجهة نظري بفنه حيران.
وحيل ساعات يكون جبان.
يخاف أي وشلون ما يخاف ذابحه الوسواس أدري بتقولون هذا حجي ما ينقال مو قلتلكم هذا الحوار حوار اخوان.
يبا الحين راح أبدي بالزبدة بس عن الحوار اللي دار بيني وبينه لا توقفون عفيه!
سعود: علامك منسدة نفسك ما تاكل؟
حمود: والله يا خوي ما دري اشفيني شكلي ببطل غنى.
سعود: زين تسوي.
حمود: يا خوي أشفيك علي كل شي مو عاجبك بكل ألبوم تنتقدني والله زهقتني.
سعود: هذا رأيي وأنا باللي أكتبه حر.
حمود: بس يا خوي مو كل شي تكتبه صح.
سعود: أكيد ولا كل شيء تغنيه صح.
بهالخزة سكت حمود ما رد، رجعت أكمل أكل وحقرته.
عقب الغدا قعدت اشرب چاي مع خالتي ام حمود «طبعا اخوي من ابوي» وكالعادة راحت خالتي فاطمة تنام العصر، ولقيت هذي اكبر فرصة ذهبية علشان اتناجر مع حمود نجرة صحافية.
سعود: شنو راح تقدم ولا كالعادة ماكو شي؟
حمود: يبا ماكو شي.
سعود: علامك امنفس.
حمود: يا خوي مالي خلقك لان تعبني نقدك.
سعود: انزين قولي ليش تبي تعتزل الفن.
حمود: والله بكيفي والامر راجعلي انت شكو يا خوي لو تبي تستقيل من «الأنباء» انا شكو فيك هذا قرارك.
سعود: فال الله ولا فالك ليش تبي استقالتي من «الأنباء».
حمود: علشان تفكني من كتاباتك اللي دودهتني.
سعود: يا خوي انتقدك من زود الميانة.
حمود: تمون يا بوناصر.
سعود: ممكن چم سؤال لان بمشي وراي برنامج «مع الناس».
حمود: قول آمر.
سعود: اعتزالك لان في فنانين شباب صاروا منتشرين أكثر منك.
حمود: افا مو هذي عادتي شكو اي شي.
سعود: مادري احس انك تغار من بشار الشطي.
حمود: في احد بالدنيا يغار من اخوه الصغير؟!
سعود: والله ما يندرا كل شي بهالزمن يصير.
حمود: لا يا سعود الا بشار حبيب من قلبي قريب.
سعود: ما تشوف نفسك قمت ترجع ليه ورا.
حمود: يا خوي دائما الانسان يوقف وقفات يتأمل فيها كل شي حوله ووقفتي اليوم اهي اعتزال.
سعود: وجمهورك شلون تخليه.
حمود: علشان جمهوري بأعتزل هالمرة.
سعود: انا بمشي ألحين چنه بخاطرك تقول شي.
حمود: ودي اغنيلك اغنية.
سعود: قول.
حمود: انا حالي اهو حالي
بعيني انت الغالي
اشوفك شوفة عيالي
وترى جرح الضنى يبرا.
سعود: چان زين تكون اهداءك الاخير حق جمهورك، في امان الله. حمود: في امان الكريم.
* زاوية جديدة اتحدث من خلالها مع احبائي الفنانين دون مجاملة ولا رتوش ومن غير اي مقدمات وحواجز. حوار من القلب الى القلب حبايبي الفنانين كل اللي يكتب بالزاوية اهو من زود الميانة.

[نايف العيدان]

ههههههه إي والله من زوود الميــآآآنه .

بالتوفيق لحمود ناصر لكن سبب خروجة زي ماقال سعود فيه شباب تعدوهـ

[راشد عبدالوهاب النعماني]

حمود ناصر من خيرت الفنانين الشباب في الكويت
ولكني أفضل حمود ناصر المؤلف أكثر من المطرب