[>< ساره ><]

هبه حماده في أول ظهور لها برمضان ترد فيه على تساؤلات لمسلسلها المثير للجدل بوكريم !!

من هو بوكريم ؟!
هل هو كويتي ؟!
وماهو هدف الكاتبه من طرح قصة أسره "معدمه" في دولة مترفه مثل الكويت !!!

مداخله هاتفية في قناة العربية اللي يبث منها يومياً برنامج ( دراما رمضان ) ،،

المداخله

##
##

للأمانه تكلمت عن المسلسل بشكل عام بس انتقادات الناس ماردّت عليها !! وبصراحه أكثر ابيها ببرنامج سرى الليل لأنه البرنامج اللي يتكلم عن اعمال رمضان وبوكريم منهم وهو المكان اللي انتقدت فيه وآآيد والمفروض ترد منه ،،
بس اتمنى احتكارها مع MBC مايكون أهو سبب عدم ظهورها !!

[سوالف بنت]

انا حسيت بتناقض غريب في شخصيه بو كريم مرات تحسه عزيز نفس ومرات احسه طرار يقعد يستعطف الناس ويقول انا برقبتي سبع بنات وشفناه يوم تحايل على الحرمه اللي اوهمها انها دعمته عشان الفلوس مع انه باول حلقه يوم مشهد الصايغ اللي اتهمه زور كان عزيز نفس لما رفض الفلوس
وفي نقطه مهمه بناته وين يودون الفلوس كلهم يشتغلون وببيتهم مافي الا الماي
نبغى شوي واقعيه ياهبه

[ابو فيصل]

في اول مقطع من المسلسل مكتوب (هذا المسلسل من خيال الكاتبه)يعني هذا مسلسل خيالي ما يحاكي الواقع وهو مسلسل ناجح والدليل انه ماخذ اعلى نسبة مشاهدة خلاص الجمهور حب المسلسل اذا فيه واحد او ثنين كرهوا المسلسل او ماعجبهم المسلسل العالم كلها كرهته ما يصير الحين بدال ما تساندون الكاتبه تحطمونها زيادة ترا توها لها 3 سنوات في الكتابه واعمالها كلها مميزه من فضه الى بو كريم واصلي ياهبه كتاباتك الرائعه ولا تلتفتي الى كلام الناس اللي لا يودي ولا يجيب

[بحر الحب]

بغض النظر عن أخطاء المسلسل وبعض المبالغات ..
لكن كلام هبة في هذا اللقاء كان جميل من خلال شرحها لمفهوم العمل وللرسالة المراد ايصالها منه , ومشكلة كبيرة تقع بالجمهور انه يقيس كل مايراه في الاعمال الفنية بالواقع .. وكأنه من المحرمات ان يتم تقديم عمل فني بعيد عن الواقع , وهذه المشكلة حلها يكون في إعادة تثقيف الجمهور درامياً حتى يتفهمون انواع الطرح الدرامي ..
والملاحظ على هبة انها تؤمن بالعمل الجماعي والشخصيات الجماعية وكلامها في اللقاء وضح ذلك ..

وجملة مهمة قالتها هبة في اللقاء : "عندما ترى حياة مختلفة عن حياتك قد تتقبلها" , وانا اتفق معاها على هذا الكلام ..
والدليل عندما يتم تقديم نماذج لشخصيات واقعية 100% وموجودة في المجتمع في الاعمال الفنية نجد أغلب الجمهور وأكثر لا يتقبل هذه النماذج .. فهي ليست مختلفة انما مشابهة ومطابقة لما هو موجود في الواقع .. فلذلك لا يتم تقبلها
ويبقى الدور الأهم على طريقة الطرح

[مكسورة وتبرد]

هالمسلسل حصل على اعلى نسبة من النقد وهو بنظري اسوأ مسلسل وسقطه للكاتبه

يعني حتى سالفة الولد اللي خدعته مره في الجمعيه اشكره لاقفتها وحاطتها بالمسلسل

كل شي مقتبسته وماخذته من افلام ونت وين التأليف عيل صدق اللي قال ماكووو تألييف

[رونالدو]

اصلا المسلسل تحس فيه شبه بينه وبين ام البنات
بس شايله هبه سعاد عبدالله وحاطه مكانه سعد الفرج
مع تغير بسيط
الى اقصده تفكك الاسري مع سعاد ابتعدوا عن ابوهم والحين مع سعد ابتعدوا عن امهم

[Abood]

المشاركة الأصلية كتبت بواسطة سوالف بنت

انا حسيت بتناقض غريب في شخصيه بو كريم مرات تحسه عزيز نفس ومرات احسه طرار يقعد يستعطف الناس ويقول انا برقبتي سبع بنات وشفناه يوم تحايل على الحرمه اللي اوهمها انها دعمته عشان الفلوس مع انه باول حلقه يوم مشهد الصايغ اللي اتهمه زور كان عزيز نفس لما رفض الفلوس
وفي نقطه مهمه بناته وين يودون الفلوس كلهم يشتغلون وببيتهم مافي الا الماي
نبغى شوي واقعيه ياهبه

صحيح كلامچ
البنات وين يودون فلوسهم
الي تشتغل طباخه والي خياطه
وبعدين نلقاهم ماعندهم ياكلون !!!!!

[الشبل]

بسنا حوارات طفوليه يا هبه ملينا

انا كنت متحمس من قبل رمضان لـ هالمسلسل لكن بعد ما شفته ما شفت شي يختلف عن اميمه حوارات طفوليه و كل واحد يقول جملته ورى بعد + مشاهد ما تدخل العقل حتى لو على قول الكاتبه انه خيالي الخيال بعد يرتكز على مقومات مثل مشهد الهام مع باسم عبدالأمير يوم على طول نشوفها و إلي هي ببيته مع انها ما ترضى بالخطأ !!

تابعت اول الحلقات لكن للأسف ما شدني لأنه مكرر مثل اداء مسلسل اميمه ما اختلف عنه شي و يمكن السنه الجايه يكون نفس الأداء بعد فـ إذا هبه واصلت على هالنهج و ما غيرت اسلوبها بتفقد كثير من الجمهور لأن الشي المكرر الناس تمل منه

[مكسورة وتبرد]

المشاركة الأصلية كتبت بواسطة Abood

صحيح كلامچ
البنات وين يودون فلوسهم
الي تشتغل طباخه والي خياطه
وبعدين نلقاهم ماعندهم ياكلون !!!!!

اي والله مادري وين يودون فلوسهم

يعني صج المسلسل مافي منطق كلش

مو معناته اغش الناس بكلمة " خيال " واخلي المسلسل حواق

يعني مو صج حتى كلينكس و قلاصات وابسط الاشياء مو قادرين يوفرونها !!

بالاضافه الى ان المسلسل شغل تجميع

يعني ماخذه القصص من كذا فلم وكذا روايه وكذا مسلسل وجمعتهم مع بعض وصار عندنا مسلسل بوكريم ..

اليوم بالحلقه من بثينه تاخذ الفطاير على حساب الرجال الشايب

كوبي بيست من قصه واصلتني من زمان عالايميل !! نفس الحوار ونفس كل شي

عيل وين التأليف !!! كل شي كوبي بيست اي مشهد اشوفه احس اني سامعته او قاريته او مار علي من قبل


وحتى ترابط بالاحداث مافي