[كاتب مبتدئ]

المشاركة الأصلية كتبت بواسطة بحر الحب

هذا انتي يابدرية , طبعج وطبع سالم واحد ما تغير من سنين , بدال لا توقفون بوجه الغلطان تسدون حلوجكم واذونكم وتقفلون عليكم الدور ليما تنتفخ صدوركم من عذاب الضمير , وانتو ساكتين .. ليما الحق اللي فيكم ينقلب باطل , والخير اللي فيكم ينقلب شر عليكم
جمال الردهان - مصاص الدماء

على فكره هالمسرحيه فيها حوارات كثيره رائعة وعميقة واسقاطات سياسيه عالجرح، اهيا والبيت المسكون وقصر الرعب

أستغرب إن عبدالعزيز المسلم كاتب هالحوارات أهو نفسه كاتب مسلسل الكرتون البيت المسكون

[كاتب مبتدئ]

- ماكو أحد يقدر يغير اللي بداخلنا، ماكو أدويه بالعالم تغير أي شي من اللي بداخلنا
التركيب السحري بداخلنا إحنا، التركيب السحري أهو عقل يفكر ولسان يقول وإيد تعمل، واحنا بهالبيت لا عقل ولا لسان ولا إيد!

سعاد عبدالله - الرائعة الخالدة "خالتي قماشة" - لكاتب الأساطير طارق عثمان

[كاتب مبتدئ]

- كل يوم يتصلون فيني، عيالك طلابة عيالك!
اعنبوكم آنا سايرتكم في كل شي، في كل شي سايرتكم، لعبت معاكم، تغشمرت معاكم، ضحكت معاكم، صرت ياهل على شانكم، صرت لكم مداس، قمت أخم وأكنس وأطبخ وأسوي كل شي على شانكم، عمى بعيونكم!

ليش جذي ليش؟ طالعوني عدل أبوكم آنا ولا ماني أبوكم؟ لكن الظاهر أمكم دلعتكم زياده عن اللزوم، الظاهر إن إيد وحده ماتصفق، وذا كل هالعناد اللي تسوونه على شان أمكم ترجع، ترجع أمكم! حاضر ترجع أمكم، آنا أعترف خلاص آنا فشلت في تربيتي معاكم، وغصبا على الكل وغصبا علي ترجع أمكم ترجع!

غانم الصالح - لولاكي ٢

أداء أسطوري من المرحوم غانم الصالح فـ الجزاء من جنس العمل، وإهمال الأب لأبنائه هذا مايترتب عليه، ولاينفع الندم بعد وقوع الكارثة، والأسرة لايمكن أن تقوم في غياب أي من الأطراف الأساسية فيها سواء الأب أو الأم، فكرة رائعة أبدع صياغتها محمد الرشود

[كاتب مبتدئ]

سمعوني.. انتوا عيالي ولا أحب شي كثركم، انتوا عيوني المركبه، بس آنا أقول لكم جدام حريمكم، والويه من الويه أبيض

اللي بيخون يخون الحين، وبهالوقت، واللي بيطلق يطلق الحين، لا تعاشرونهم أربعين سنه وبعدين تحذفونهم حذفة الجلب!

اللي بيحب يحب الحين، واللي بيتزوج يتزوج الحين، لاتبوقون أعمارهم، لاتخلونهم يغمضون عيونهم ويأمنون ولما يفتحونها مايلقونكم حواليهم، تكفون لا تظلمون، الظلم مو زين يايمه، الظلم مو زين!

سعود، مرزوق، عز، أحمد، فيصل، اللي بيجرح مرته يجرحها الحين وإهي صغيره عشان جرحها يبرى لا ينطرها لين تكبر، فهمتوا يمه؟!

سعاد عبدالله - زوارة الخميس

[كاتب مبتدئ]

من اليوم ورايح محد له كلمه بهالبيت إلا كلمتي، ومحد له أمر بهالبيت إلا أمري، ولا احد يشك خيط بإبره إلا بأمري، وبشوف كلمتي بتمشي ولا كلمتج بهالبيت، وكل شي وصل حده، كل شي وصل حده وبس! من اليوم ورايح آنا ريال البيت

خالد النفيسي - مسرحية بيت بوصالح

[الصراحة]

كل انسان جروحه لا بد تبرى لكن اكيد وراى هالجروح بقايا

مسلسل بقايا جروح - فجر السعيد

[كاتم العبرات]

إلى متى تضل فلوس العرب في غير العرب .
نعلم اولادنا قواعد النحو والصرف وننسى ابسط اصول الصرف .
لكن ماقول إلا باي باي يالندن , باي باي إلى الأبد يالندن , باي باي ومالنا بأرضك أمان .

حوارات مشتركة بين " داود حسين , هيفاء عادل , عبدالحسين عبدالرضا " - مسرحية باي باي لندن

[الصراحة]

حوار رائع بس ما نقلته كامل

[بحر الحب]

المشاركة الأصلية كتبت بواسطة كاتب مبتدئ

- ماكو أحد يقدر يغير اللي بداخلنا، ماكو أدويه بالعالم تغير أي شي من اللي بداخلنا
التركيب السحري بداخلنا إحنا، التركيب السحري أهو عقل يفكر ولسان يقول وإيد تعمل، واحنا بهالبيت لا عقل ولا لسان ولا إيد!

سعاد عبدالله - الرائعة الخالدة "خالتي قماشة" - لكاتب الأساطير طارق عثمان

أيضا من نفس العمل هناك حوار وجهته سعاد عبدالله وهو الذي هز امبراطورية "قماشة" وجعلها تعيد التفكير في اسلوب حياتها, وهو :

إحنا ممكن نكون عايشين ببيت واحد وناكل من سفرة وحدة .. لكن كل واحد عينه على لقمة الثاني وينطره يغص