[Zandi]

ع العمومن .. كنتوا لي أهل ، كنت سعيد إني عايش بيناتكم اي والله
كانت الايام تمر علي جنها دقايق ،
راح كل شي راح ،

كنتوا لي شمعة ، وانا دمعة
كنتوا لي جذر ، وانا الباجلة داخل
كنتوا لي قدو ، وانا التتن

كل شي انتهى
وقلبي ما يطاوعني اقولكم وداعاً ، لا
اقول لكم الى لقاء قريب


عبدالحسين عبدالرضا - على هامان يا فرعون

[بحر الحب]

صج إني خبله شعليه مستانسه وفرحانه جني لاقيه كنز ولا معطيني جائزة , يعني لازم أسوي عملية .. معناها الحالة خطرة , ويمكن العملية تنجح ويمكن ما تنجح وأتوكل على الله , بس منين ياني مرض القلب هذا وأنا عمري ما اشتكيت ولا رحت لطبيب , كله مني .. آنا اللي فاولت على نفسي , زين والحل ألحين .. آنا خايفه , أول مرة أحس بالخوف .. بس جزاي وأقل من جزاي , يعني مالقيت غير القلب .. طيب شفيها اللوز ولا المرارة
حياة الفهد - الملقوفة


البنت اللي تعصى أمري , وتطلع عن طوعي , ما انولدت .. ولا اعتقد انها بتنولد , مو تسافر .. لو تطير لسابع سما , والله .. لألحقها وأنا عقاب
غانم الصالح - أم البنات


تعالي يا موزة وين رايحه , هدي القميص وشوفي صاحبه .. ياريت عندج شي يروح اللي صار بقلبه
محمد المنصور - زوارة الخميس


أبي أشبع من لمتهم حواليي , غافلتنا الايام وركضت جنا كنا يهال نلعب بالحديقة , وفجأة .. أحمد طلعت له لحية .. وسعود صلع .. وفيصلو صار طول الباب .. وعز صار عنده شنب .. وشاهة صارت مره .. وأمي صار عندها أحفاذ .. وآنا تزوجت , شلون الأيام تركض بسرعه جذي
خالد أمين - زوارة الخميس

[بحر الحب]

أنا صرت أم وأنا عندي سبع سنين , صرت أم لاختي وانا عمري سبع سنين تخيلي .. أمي انسحبت إقامتها من الدنيا بسرعه وسافرت عن طريق صليبيخات , وابوي أمي استعيلت عليه ما قدرت تصبر عنه .. دزت له كرت زيارة من هناك , بعد ما توسطت وطلعت روحها ولقت لها واسطة وحصلت على كرت زيارة حقه , قلنا له يا يبا لا تروح .. لا تروح وتخلينا بروحنا في هالدنيا الغدارة , قال لا .. خلكم بالدنيا الدنيا حلوة , قلنا له خذنا معاك .. قال لا خليكم قاعدين الدنيا حلوة , خلي يجي ألحين يشوف حلاوتها
أنا لي أهل .. لو مالي أهل جان ماشفتيني هني بهالعز .. بهالسعادة والراحة اللي أنا فيها , أنا لي عم .. عم ذهب , ولي مرت عم .. كلها طيبة وحنان وحب وكرم , ربونا يا سستر .. وتعبوا علينا .. وماقصروا معانا جزاهم الله خير , دخلونا مدارس .. وعلمونا , ويوم حسوا اننا أذكياء وشطار .. طلعونا ما قصروا , طلعونا وحرمونا من ورث أبونا , أخذوا كل فلوسنا , وموبس هذا بعد .. لا سوو أكثر فضلهم ما ينسي , فرقوا بيني وبين أختي , أختي مبروكة اللي أعتبرها مثل بنتي الصغيرة , فرقوا بيني وبينها وحرمونا من بعض , شفتي شكثر آنا محظوظة
حياة الفهد - على الدنيا السلام


حاسب نفسك يا مانع قبل لا تحاسب غيرك .. الغلط انت السبب فيه , عيشتنا بكبت وحرمان .. خليتنا نضيع طريجنا , اعنبوك حرمتني آنا من حياتي من عيشتي .. حرمت أختك فتون انها تعيش حالها حال الحريم , عيشتنا بين أربع طوف عتج بتقاليد عتيجة انتهت من سنة يدي , طالع عيوبك قبل لا تطالع عيوب الناس
عبدالحسين عبدالرضا - الحيالة

[كفاح]

المشاركة الأصلية كتبت بواسطة بحر الحب

حاسب نفسك يا مانع قبل لا تحاسب غيرك .. الغلط انت السبب فيه , عيشتنا بكبت وحرمان .. خليتنا نضيع طريجنا , اعنبوك حرمتني آنا من حياتي من عيشتي .. حرمت أختك فتون انها تعيش حالها حال الحريم , عيشتنا بين أربع طوف عتج بتقاليد عتيجة انتهت من سنة يدي , طالع عيوبك قبل لا تطالع عيوب الناس
عبدالحسين عبدالرضا - الحيالة

من اقوى الكلمات اللي نقالت في نهاية المسلسلات

مشكور يابحر على الموضوع الجميل القديم اللي انا وصفته بأنه كل ماقدم كل ماكان احلى

[بحر الحب]

انت تدري يا مبارك سالم بالنسبة لي شنو , اهو روحي واهو حياتي واهو كل شي .. اهو قطعة من جوفي , أخوي سالم كان كل حياتي اللي أنا عايشها .. أنا طلعت على ويه الدنيا ما عندي لا أم ولا عندي أبو .. ماتوا وآنا صغير , سالم بالنسبة لي اهو أمي واهو أبوي , الشيطان عمى عيوني يا مبارك .. فلوس الحرام منعتني يامبارك من إني أشوف أخوي وأنتبه له .. آنا تعبان
عبدالرحمن العقل - دلق سهيل 2


كل واحد راح يتحاسب عاللي سواه , اللي تعاون معاهم , واللي استغل الظروف اللي احنا فيها ولعب لعبته .. واللي ارتكب جرائم بحق الشعب الكويتي , واللي عذب وعدم وهتك الأعراض وشرد الناس .. كل واحد منكم راح ياخذ جزاه , ما فكرت بأطفال الكويت ويايني ألحين تبيني أرحمك عشان اطفالك ,, لا يالسفاح .. حتى الأطفال عدمتوهم , نسيتوا الرضع اللي طلعتوهم من الحاضنات وقطيتوهم على الأرض يا مجرمين , وين كانت الرحمة عنكم .. ليش مافكرتوا بأطفالنا عشان اليوم نفكر بأطفالكم , حسابكم ما راح يكون على ايديني آنا بس .. حسابكم راح يكون على إيد الشعب الكويتي , الشعب الكويتي اللي دستوا على كرامته فوق أرضه .. اللي طعنتوه من الخلف في الوقت اللي كان ماد إيده لكم .. الإيد اللي كلها خير ووفا يا ناكرين الخير وخاينين الجيره , سألوا اللي عدمتوا عياله جدام عينه .. سألوا اللي أخذتوا منها ولدها وللحين ما تعرف عنه شي .. سألوا اللي رملتوهم ويتمتوا عيالهم .. سألوا يامجرمين كل أسير قاعد ألحين بسجون بغداد من غير أي ذنب , ذنبه الوحيد انه كويتي .. ويحب الكويت , سألوا هذيله كلهم .. قولو لهم .. شتحكمون علينا فيه !!
أحمد السلمان - مخروش طاح بكروش