لا أنت شكلك وايد شايل في قلبك علي, ترى إذا غلطت عليك في رد كتبته قولي لأني مو من الناس اللي يحبون يسوون لهم أعداء حتى لو على النت. يعني ردين ورا بعض كل هذا عشان أسلوبي في الكتابة و الوجوه اللي حاطها موعجبتك, يعني أنا بس قاعد ألعب. الوجوه اللي حطيتها من القهر اللي فيني على وضع وسطنا الخليجي, و غير عن جذي أنا حبيت بس أكون خفيف عليكم, واعتقد أنا مو أول واحد يكتب بهالطريقة. ثاني شيء ليش تحسسني كأني مسوي روحي الأحسن مابينكم! وزير إعلام و ممثل و ناقد إعلامي! أنا حتى لو كان أسلوبي هيلقي بالنسبة لك, أنا مااعتقد أني غلطت أو جرحت في أي أحد, يعني اللي يسمعك يقول أسلوبي أسلوب مي العيدان على الفيس بوك و التويتر. إذا كان قصدك بان موضوعي مامنه فايده لأنه مجرد تذمر, فاعتقد أن هالشبكة معروفة عند الكثير من اللي يشتغلون في الوسط الفني فطرح مثل هالمواضيع قد يكون منه فايده.

على العموم, أتمنى ماتصير أي مشاكل بينا وهاذي ورده لك "وردة"

أولا اشكر أخواني محمد العيدان و الشبل على الرد "وردة"

ثانيا, ارجع لأخوي الجليب


ألحين كان ماحطيت لي هالرد من البداية بدال النغزات! لا ترى صج أنا غلطت عليك في شيء؟ إذا كان أسلوبي في الكتابة مو عاجبك كان قلت لي بأسلوب أرقى من ردودك كأن خاطرك اتهاوش, لكن معليش, ارجع و أقول أتمنى ماتصير أي مشاكل بينا و مرة ثانيه هاذي ورده لك "وردة"

مشكور على هالورده :) من اول ما دخلت الشبكه والاعضاء يعطوني ورد وانا مستانس بالورود

بالنسبة لمسألة الجودة فعلا أصبت فيها يا اخ ميموري العمل لا بد من يكون ذات جوده يعني ممكن اقل حركة خطأ او مو في محلها من اي ممثل تأثر نوعا ما بس مو ذاك التأثير فلازم الممثل يكون ذكي يعرف يتعامل مع كل مشهد وموقف يعطيه حقه وعدم ظهور اداء مفتعل ومبالغ فيه بمعنى الممثل يكون صادق كثر ما يقدر حين تأديته المشهد الفلاني ... يعني الدقة مطلوبه وخصوصا بالكوميديا علشان لا نخلق جو من الفوضى وهذا لا يعني ان الممثلين يكونون جامدين مثل المسطره وجالسين بمكانهم بلا حركة لا ... لان الكوميديا بحاجة الى حركة وتفاعل وصدق ايضا في الحوار واعطاء كل موقف حقه انا اتكلم بشكل عام سواء مسرح او تلفزيون

مشكور على الرد "وردة". الحمد لله, طاح الحطب :)

تعبنا واحنا ننتقد أعمال أم سوزان ..
أم سوزان نزل عليها حب من السما للاعمال التقليدية الفاشلة ولكل ماهو تقليدي ..
أصبحت تتحفنا بالسخافات والاسفاف الفني وانتاج المقاولات والتعامل مع اشباه الكتاب والفنانين ..

عمل من تأليف النشمي وانتاج البذال .. بمجرد ما صدرت اخبار عن العمل بهذه الاسماء عرفت بأن المستوى سيكون سيء جدا جدا جدا

والمخرج البكر لاول مرة اسمع باسمه واخراجه من أفشل ما يكون ..
ممثلين من فئة الـ"ربع دينار" , وهذه مشكلة فعلا فالوسط الفني مليء بهذا النوع من الكومبارس الذي يأخذون أكثر من حقهم , ومؤسف ان فنانة بحجم حياة تحتضنهم ..

الكومبارس وطوفناهم .. لكن ما نطوف اللي محسوبين على الفن والنجوم مثل مشاري البلام وزهرة الخرجي الذين يقدمون اداء من اسوء ما يكون ..
وحتى حياة الفهد صار ادائها "ما ينبلع" للاسف ..

ويا أخ ميموري .. ليش نطالع اعمال هوليوود واعمال برا
أضعف الايمان في الخليج حيث تقدم اعمال كثيرة فيها الاداء من احلى ما يكون والاخراج من افضل ما يمكن لكن وين اللي يشوف هالاعمال ويخاف على اسمه ويقدم الشيء الممتاز ؟

الكاتب النشمي نجربه للمرة الثالثة ولا تقدم يذكر وهو احد المستفيدين من أضواء الكتاب الشباب ..


وكلمة أخيرة :
من بعد هالجم حلقة .. جاري حذف العمل باللي فيه إلى أقرب سلة مهملات

مشكور أخوي بحر الحب على الرد "وردة"

اتفق معاك في كل اللي قلته وادري أن مثل هالموضوع مو شيء جديد أبد, لكن والله من القهر اللي فيني, يعني إذا مو راضيين يحترمون الجمهور الخليجي خل على الأقل يحفظون ماء وجه الدراما الخليجية أمام باقي الشعوب. طبعا أكيد أنا ما أعمم ومثل ماقلت عندنا أعمال الاداء فيها من أحلى مايكون, لكن الواحد شيقول بس عن اللي مايخافون على اسمهم, إذا فعلا مايخفون على اسمهم عيل في الطقاق, على الأقل خل يتذكرون أن أعمالهم المخجلة راح تحسب على الخليج. للأسف, أم سوزان وهي من كبار الفنانين الخليجيين توقعت منها هي بالذات أنها تكون حريصة على جودة الفن الخليجي, حتى لو المسلسلات اللي تختارها سخيفه, لكن ماذا عن الأداء! أم سوزان صارت بس فالحة في احتضان المتردية و النطيحة مثل ماقلت وعدم السماح بالملابس الكاشفة للفنانات معها في مسلسلاتها, انزين والدخلاء!!!!!

إنشاء بس نخلص من هالممثلين اللي يسمعون تسميع مثل ماخلصنا من عاهات مثل مكياج الأعراس و مسلسلات الفشخرة لفجر السعيد ومعاهم مسلسلات زينب العسكري و على طاريها, قبل كم يوم ماادري اش طاري علي قلت خل أجرب أشوف شوي من مسلسلها الفاشل لأبعد الحدود "لحظة ضعف", بالغصب تحملت اشوف 5 حلقات, الدخلاء في مسلسلات أم سوزان يهونون ألف مرة عن الدخلاء في مسلسلات العسكري, مااقول غير صج عاهة وخلصنا منها.

المسلسل كله اسخف من السخيف انه ماقدرت اشوفه أكثر من عشر دقايق

والممثلين الي ياخذون ادوار البطولة في هالموسم (الموسم الغير رمضاني) سالفة ثانية الي تحسسك انها تشوف الكاميرا واهي تتكلم والي تسمع مثل ما قلت والي والي .....

تسلم اخوي على الطرح

انا بس شاهدت حلقتين وعرفت ان العمل فااااااشل وكلمة فاشل قليله بحقه
المشكله لاممثلين حلوين لااخرااااااج لاقصه هذا المسلسل يجمع سخافاااااات كلها فيه
ماقول الا احنااااااا وين بالفن ايران وتركيا صارو احسن من الخليج بمراحل سنين ضوئية بالفن
واحناااااا من فشل الى فشل للاجل المال

MemoryDisaster13
اخوي انا اشوفك تكلم عن زينب العسكري
احب اقولك ان زينب افضل من فنانين الكويت الحالين كلهم
مسلسلاتها كانت رائعه والكل كان يشااهدها
هل شاهدت عذاري او دمعة عمرررر وغيرها
قال عاها قال اذا زينب العسكري عاها اجل فنانين الموجودين حاليا شنو؟؟

مشكور أخوي على الرد "وردة"

وصح مثل ماقلت, أصلا سالفة هالممثلين اللي يسمعون و يحسسون الواحد أنهم قاعدين يشوفون الكاميرا ماقامت تنتشر الا من بعد انتشار سالفة المسلسلات الموسمية.

مشكور أخوي team rocket على الرد "وردة"

أنا يوم تكلمت عن مسلسلات زينب العسكري ماكنت اقصد كل المسلسلات اللي شاركت فيها, كنت اقصد المسلسلات اللي من تأليفها. بالنسبة لعذاري, أنا ما شاهدته لكنه عمل مشكوك في أمره, هو من تأليف بنت العسكري أو من تأليف القفاص و الفردان. سالفة طويلة عريضة لكن اغلب الظن أنه من تأليف القفاص و الفردان لأن بنت العسكري قامت تنشر أكاذيب عن الاثنين لكن كثير من الفنانين اللي شاركوا في العمل طلعوا في الصحافة ودافعوا عنهم. بالنسبة للمسلسلات من تأليف زينب العسكري, فهي ماتوفقت في هالجانب و عندها مسلسل يمكن كان حديث الساعة وقت عرضه اللي هو "لحظة صعف", اللي ممكن يجذب الواحد لمشاهدة مثل هالعمل الجرأة في الطرح, لكن أنا واحد من الناس اللي أشوف بأن هالشيء ماشفع للعمل و ظهر بشكل مخجل جدا. أنا مااشكك في قدراتها التمثيلية, ممكن يطلع منها أداء وايد حلو مثل في دمعة عمر و مسلسلات ثانية, لكنها خربت على نفسها بنفسها.