وأنا ياخوي أصفق لك تصفيق حار على هالرد الحلو, أنت شكلك واحد من الناس اللي بس يحبون يتشمتون بالوسط الفني الخليجي و أنت بروحك خليجي. يعني على كلامك اشرايك تطالب بإغلاق هالموقع بكبره مرة وحده, لأني مااعتقد أن أي موضوع انكتب أو بينكتب راح يقدم أو يأخر في مستوى الفن عندنا, ليش ننتقد ونطالب بالأحسن! خل بس نمدح و نستانس بالأعمال اللي برع و نسب و نذم بأعمالنا, لا تفكيرك عجيب عجيب :), تبي تفهمني أني غلطان يوم نزلت موضوع انتقد فيه مستوى إخراج أعمالنا وأشباه الممثلين اللي كل مالهم ويزيدون, يعني صرت أنا الوحيد في الموقع اللي ينزل مثل هالمواضيع!

يعني أنت ألحين رديت علي هالرد الصاروخي ليش! خاطري ترد علي, مو أنا بنفسي ابي الموضوع يصير تفاعلي. لأني قلت أن الفن الخليجي بخير من عقب 2008! لأني قلت أن عاهات مثل مكياج الأعراس وغيرها مثل مسلسلات بنت العسكري تخلصنا منها! ابيك ترد علي, و هالمرة رد عدل مثل الناس.

الشبكه بكبرها ما تحرك شعره وحده بالفن لا توهمون نفسكم بأشياء خيالية :)

شدعوه بالعكس موضوعك جيد تفاعلي وما عليه غبار شاك بعمرك افا عليك انا اقول انشاء الله لعلى وعسى يتطور الفن للاحسن ببناء المسارح الضخمه المهيئه للعمل وكتاب مسرح وتلفزيون وانه الشباب يبنون نفسهم بنفسهم يعني حلو التفاؤل احسن من هالوضع اكييد الناس بتتشمت يعني قايل شي جديد الجمهور شبع تشمت وكلنا تشمتنا بهالوضع واحنا متحمسين كونا جمهور فن نأمل ان يعود الفن كما كان ليس كالسابق انما للاحسن .... فمشاركاتك انت بالشبكه بالذات تحسسني انك بتصير وزير الاعلام او ممثل او ناقد صحفي وخصوصا هالوجوه اللي حاطها فأنا متفائل فموضوعك حمسني وعطاني طاقة وانا وايد فخور فيك

فبالعكس منو قال انك غلطان لما نزلت الموضوع خله على وضعه ولا تطلب من الادراه تلغيه ترى أزعل عليك .... قوول كلمه فيها خير ما عليك زود ومن هالكلام.... ومن وجهة نظري واكرر كلامي مره اخرى حاس انك بتصير وزير الاعلام مجرد احساس وراح يتقدم الفن على ايدك من جميع النواحي ... كلامي غلط ولا فيه عيب

وبالنسبة للاخوه الاعضاء المشاركين اغلب تعليقاتهم تختلف عن تعليقك انت تمتاز بسحر بالكتابه وتصلح بكتابة مقالات ولك مستقبل بالاعلام صدقني

الشبكة بكبرها ما تحرك شعره بالفن انا معاااك والله... اكيييد ما تحرك ابره مو قايل شي من عندك اخووي عرفت شلون اذا عبدالحسين عبدالرضا بشحمه ولحمه رفضوا جميع مقترحاته المتعلقه بالحركة الفنية .... و لكن صاحب الموضوع له مستقبل انت بس شوف اسلوبه بالكتابة وبترتيب حوارته والجمل والكلام الموزون والنقد تقووول اعلامي فول اوبشن على مستوى مو اي اعلامي عادي يعني انا دققت في كل كلمة يقولها صراحه يتكلم من قلب وواقع بس شكله مو واثق من نفسه .... باختصار يستحق يكون وزير للاعلام

اعتب على الذين ردوا على الموضوع لشخص كاتبه وليس للموضوع نفسه ... عموما ... اشباه الفنانين والفنانات متواجدين بكثرة بعضهم دخل الفن للاسترزاق والبعض الاخر دخله حتى يتسكع في المولات وغيرها لكي تؤشر عليه الناس ... انا اقول الفن بإنحدار تام ولو لا وجود من تبقى من الكبار ومشاركتهم الاعمال لوجدنا انحدار تاما في مؤشر الدراما والفن ... لكن السؤال هو :

بعد عمر طويل انشاءالله لو ابتعد من تبقى من الكبار عن الساحة الفنية لاي سبب من الاسباب هل سنشاهد اعمالا تحمل الفكر والهدف والمضمون بالاضافة الى موهبة التمثيل ؟؟؟

كل شي في اييد وزارة الاعلام والباقي على الممثلين انهم يظهرون ويبينون للناس شعندهم وامكانياتهم وقدراتهم الفنية علشان ما نسمع ان فلان يشتكي ان الفن كذا وكذا وان الفن فيه دخلاء وبدأت اعدداهم بالتزايد يعني كل شي له حد... في السابق ما كنا نسمع بالدخلاء وفي نقطه الممثل يعرف من يختار من الفنانين مو اي فنان ماله علاقه بالفن يمثل مع نجوم كبار كحياة الفهد وسعاد وحسين عبدالرضا وغيرهم ولان الجمهور الصراحه يرفض هالشي ... يعني فيه شروط وقوانين واولويات تحددها وزارة الاعلام للنهوض والتطور وفيه اشياء كثيره ناقصه حتى ما نسمع فلان اشتكى ناقصه هالشيء ومحتاج احد يسانده ( لا يجوووز )

يعني كل من هب ودب صار ممثل باجر فرضا انا اصير ممثل او غيري وما عندنا موهبه ... الفن راح يضيع وينحدر الى الاسفل وهكذا مستمره العمليه ولان الجمهور يمكن يتقبلنا بمجال اخر يختلف عن مجال التمثيل ... وهذا الكلام معروووف

في الاونة الاخيره نشوف ان الدخيل بارز على حساب الفنان صاحب الموهبه شي عجيب ... هالدخيل خل يشيل عمره علشان يصير مساند او يضيف للعمل شي مضحك

انا اشوف ان الفن صار فاسد وكلام بذي والممثلين فاسدين والجمهور الله اعلم شنو بيصير هذا الفن ما يدخل عقولنا ... لكن بنفس الوقت يدخل في عقول اللي ما عندهم لا شغل ولا مشغله فكل شي له حدووود

لا أنت شكلك وايد شايل في قلبك علي, ترى إذا غلطت عليك في رد كتبته قولي لأني مو من الناس اللي يحبون يسوون لهم أعداء حتى لو على النت. يعني ردين ورا بعض كل هذا عشان أسلوبي في الكتابة و الوجوه اللي حاطها موعجبتك, يعني أنا بس قاعد ألعب. الوجوه اللي حطيتها من القهر اللي فيني على وضع وسطنا الخليجي, و غير عن جذي أنا حبيت بس أكون خفيف عليكم, واعتقد أنا مو أول واحد يكتب بهالطريقة. ثاني شيء ليش تحسسني كأني مسوي روحي الأحسن مابينكم! وزير إعلام و ممثل و ناقد إعلامي! أنا حتى لو كان أسلوبي هيلقي بالنسبة لك, أنا مااعتقد أني غلطت أو جرحت في أي أحد, يعني اللي يسمعك يقول أسلوبي أسلوب مي العيدان على الفيس بوك و التويتر. إذا كان قصدك بان موضوعي مامنه فايده لأنه مجرد تذمر, فاعتقد أن هالشبكة معروفة عند الكثير من اللي يشتغلون في الوسط الفني فطرح مثل هالمواضيع قد يكون منه فايده.

على العموم, أتمنى ماتصير أي مشاكل بينا وهاذي ورده لك "وردة"

أولا اشكر أخواني محمد العيدان و الشبل على الرد "وردة"

ثانيا, ارجع لأخوي الجليب


ألحين كان ماحطيت لي هالرد من البداية بدال النغزات! لا ترى صج أنا غلطت عليك في شيء؟ إذا كان أسلوبي في الكتابة مو عاجبك كان قلت لي بأسلوب أرقى من ردودك كأن خاطرك اتهاوش, لكن معليش, ارجع و أقول أتمنى ماتصير أي مشاكل بينا و مرة ثانيه هاذي ورده لك "وردة"

مشكور على هالورده :) من اول ما دخلت الشبكه والاعضاء يعطوني ورد وانا مستانس بالورود