[محمد العيدان]

المشهد الثاني :



المذيعة : نأسف لهذا الخلل الفني .. وذلك لانقطاع التيار الكهربائي ..

بوصالح : ( مقاطعا ) حطوها براس وزير الكهربا .. التيار الكهربائي مانقطع تجذبين .. انتو قطعتو الارسال ..

بومجبل : ( ضاحكا ) صح . صح . صح .. بيقطعون كلامك .. مصختها يا بوصالح .

المذيعة : نأسف عزيزي المشاهد لتداخل ارسال المحطات في بعضها البعض .. لكثرة الارسال الفضائية عندنا ..

بومجبل : سمعت يا بوصالح .. سووك محطة فضائية ..

بوصالح : ومو بعيدة اصير محطة مدفوع لها .. وبفرق الوحدة الوطنية .. واشوه صورة القوى الوطنية ..

المذيعة : كاميرا التلفزيون تتجول الان في شارع الحجي .. شارع الخليج سابقا .. وشعار هذا الشارع ..

صوت 1 : الحجي الكود ببيزة ..

صوت 2 : كثر الحجي يزيد المعرفة ..

المذيعة : ولكن بعضهم قال :

صوت 3 : ( مقاطعا ) خل الكل يحجي . واللي بالجدر يطلعه الملاس

المذيعة : شارع الحجي .. هو بالضبط مثل الهايد بارك بلندن .. ولكن الفرق بين شارع الحجي عندنا والهايد بارك عندهم .. الهايد بارك تفتح كل يوم احد .. ولكن شارع الحجي عندنا مفتوح على طول ..

( المذيعة توقف احمد المارة )

المذيعة : مساء الخير ..

احدهم : مساء الحجي ..أأأقصد مساء النور..

المذيعة : تلفزيون الكويت يسعده ان يلتقي معاك ويحجي معاك بشارع الحجي

احدهم : اهلا وسهلا فيج وفي برنامج الحجي وبشارع الحجي ..

المذيعة : ممكن اعرف منين جاي ؟؟

احدهم : هو فعلا سؤال وجيه وبمحله .. انا جاي من مكان ما !!

المذيعة : ليش سر ؟؟

احدهم : لا .. مجرد احتياطات امنية !!

المذيعة : هذي مهمة وزارة الداخلية !!

احدهم : انا اتكلم انطلاقا من المبدأ القائل كل مواطن خروف .. اقصد خفير

المذيعة : وزارة الداخلية قايمة بواجبها وهي متخذة جميع الاحتياطات الامنية للحفاظ على حياة وامن كل مواطن او مقيم .

احدهم : قال من شاهدك يا بو الحصين قال ذنبي !!

المذيعة : انت متحامل على وزارة الداخلية ..

احدهم : وايد ..

المذيعة : ممكن توضح الاسباب ؟!


احدهم : الاسباب وايد واقدر اوضحها وبصراحة !!

المذيعة : احنا بشارع الحجي .. وماعندنا غير الصراحة بالحجي ..

احدهم : بس اخاف الارسال ينقطع ..

المذيعة : لا ماينقطع ..

احدهم : عيل اخذي عندج .. رجل الامن ومن يصير حزة طلعة الموظفين من الدوام .. اترسوا الشارع ومامهنتهم الا يوقفون بنات خلق الله .. انتي طفتي الاشارة .. يبه الاشارة كانت خضرا .. واهي صاجة .. بس رجل الامن بيسويها غصب حمرا .. يبي يفتح باب الحوار بينه وبينها .. علشان تتكرم وتاخذ رقمه ..

المذيعة : مااعتقد ..

احدهم : لا .. اعتقدي

المذيعة : اتمنى من معالي وزير الداخلية قاعد يشوفنا الحين ويسمع كلامك ..

احدهم : اتمنى انه يتحرك على الاسلحة اللي تارسة الديرة ..

المذيعة : وزارة الداخلية ناشدت المواطنين بتسليم الاسلحة .. ورخصت البعض منها ..

احدهم : وحق هالبعض مانبيه .. مانبي سلاح خير شر !!

المذيعة : والحل شنو بنظرك ؟؟

احدهم : انا احب اناشد وزري الداخلية باسم الديرة واهلها بأنه يقوم بحملة كبيرة لجمع السلاح .. واقوله حاصروا كل منطقة بمنطقتها ومشطوها .. وحاسبوا الكبير قبل الصغير .. وصدقني معالي الوزير كل مواطن مخلص ويحب هالارض بيتعاون معاك !!

بوصالح : سمعت يا بومجبل ؟؟!

بومجبل : سمعت !!

بوصالح : شرايك ؟!

بومجبل : اذا هي رادة علي .. انا ابصم بالعشرة مع هالمطلب .. واحب اقول لوزير الداخلية المطلب هذا مطلب شعبي .. مطلب الاغلبية .. هذا اهو رأي الديرة ..

بوصالح : اي بساخاف باجر تقلبون على وزير الداخلية وتغيرون رايكم انتو محد يعرف لكم .. ربعي واعرفكم انتوا يا اهل الكويت مثل " الكتويل "

بومجبل ( مقاطعا ) : مااظن مااظن . هذا مطلب شعبي نابع من الارادة الشعبية .. ارادة هالشعب البطل المغوار الوفي !!

بوصالح : بو مجبل !! حنا عيال قرية !!

بومجبل : ولو .. حنا عيال قرية بكل شي .. الا النواحي الامنية . انا اقول الديرة متروسة من الخونة والمندسين . مجموعة كبيرة من مخلفات الغزو عايشة بينا .. وصارت بقدرة قادر بدون .. اليوم .. دش الديرة .. خش جوازك .. والبس دشداشتك .. وجوت غترتك .. ورز عقالك .. وقول بدون .. وبسهولة تلقى من يطلب لك بالجنسية ومن يشهد.. لك
حنا شايتين زاهبين لهم ومشهورين فيهم .. الشهادة والكفالة .. احنا يا بوصالح اخذنا جائزة نوبل بالكفالة .. فيزا .. عدم ممانعة .. وكرت زيارة .. وجواز مادة 17 .. وجنسية زاهبين .. واعذارنا وشعاراتنا تحت اباطنا ..

بوصالح : خل الناس يابومجبل .. مجلسك .. مجلسك !!
بو مجبل : ردينا على المجلس ؟!

بوصالح : غصبا علينا نرد له .. اهو اللي يجيب الحجي لنفسه .. قبل جم يوم وقف عضو من الوطنيين الاحرار .. يطلب بعدم جمع الاسلحة .. وماكفاه هالموقف .. طالب الحكومة تعطي كل بيت صواريخ باتريوت ومدفع هاون ورشاشات حق اليهال على قولته ..!!

بومجبل : مابقى الا يطالب بنظام الميليشيات ..!!

بوصالح : بيصير .. كل شي بيصير .. دام الطاسة ضايعة . كل شي بيصير

بومجبل : ومن قال لك بنسكت ؟! هذي بداية المؤامرة علينا .. هذا اهو الغزو الجديد .. اللي بيغزي الديرة من الداخل ...

بوصالح : الله يستر .. انا مااقول الا الله يستر ..

انتهى المشهد الثاني وترقبوا المشهد الثالث