شبكة الدراما والمسرح الكويتية الخليجية

السلام عليكم ورحمة الله وبركاته
برغم أن الموضوع قديم شوي بس حبيت أذكر هذا الموقف اللي سويته متعمد مع الفنان العملاق بوعدنان بسبب اللي أسمعه عنه مثل كل الناس عن طيبته وأخلاقه ، بصراحة قررت أختبره ، بالذات لأني ماني من المقربين منه عشان يجاملني.
كنت الموظف المسؤل في بوابة كبار الشخصيات بوزارة الإعلام ، وكان الفنان عبدالحسين يدخل منها منذ سنوات بصفة خاصة ماهي لغيره من الفنانين اللهم إلا الفنان العملاق سعد الفرج ، المهم ما أطول عليكم .. وصل الفنان عبدالحسين على الجيب الكايين قاعد جنب السايق ووقف طاااط دق هرن ، طلعت له
قلت بالحرف الواحد : هلا طال عمرك ..
رد علي مع نظرة إستغراب : هلا فيك ..
قلت : آمر ..
رد : بدش ..
قلت : آسف إنت ممنوع ..
باستغراب رد : ليش ؟! ..
قلت : ما عندي علم ..
أشر للسايق ودور السايق وراح دخل من الباب الرئيسي العادي ،ولما مر من جدامي داخل الوزارة أشرت له فوقف ، جيته
قلت : طال عمرك .. ترا ما كان في عليك منع من الدخول من بوابة كبار الشخصيات ولا شي ..
رد : طيب ليش حضرتك منعتني ؟! ..
قلت : أتقشمر وياك !! ..
رد : كبرك أنا تتقشمر وياي ..
ضحكت : عادي مو إنت أبو الكوميديا ..
رد : هالمرة سماح .. مرة ثانية بقرصة إذن ..
راح وهو يتبوسم ..

يمكن يكون الموقف عادي بس من هرم مثله لا مو عادي خصوصاً لما تعرفون أن كثير من الممثلين الجدد يوصل الأمر لحد الطرد بسبب سوء أخلاقهم وتصرفاتهم الغريبة ، ليش ؟ بس عشان يدخلون الوزارة من بوابة كبار الشخصيات غصب.
إنتهى ودمتم