المرجلة
إذا المراجل لبسة شمـاغ و عقـال
قل للعـذاري يلبسـن العمايـم
ماعاد يفرق زول حرمة و رجـال
دام الفعايل تشبه البعـض دايـم
المرجلة ماهيـب كلمـة و تنقـال
و تروح ماراحت هبوب النسايم
و لا خشونة صوت أو رفع الاثقـال
أو رزة صدور و فعل الزلايـم
و لا هي بعد مفتاح موتـر و جـوال
و لا ردى لسانن حديثة شتايـم
المرجلة شيمه عن القيـل و القـال
رفيع نفس(ن) حـر بالجـو حايـم
المرجلة عقل وزن وزنـه جبـال
ودون العقل و ش فرقنا و البهايم
يامسندي لومايل الوقت بـي مـال
ياولد أبويـه ياعظيـم العزايـم
يامعرب الجدين من العـم و الخـال
يا نخوة المفزوع وقت الهزايـم
المرجلة يا خوي هي طولـة البـال
هي العزم هي الصبر فالظلايـم
فيها الكـرم عـزة دلـه وفنجـال
فيها الكرامه عن ردى الطبع شايم
و الدين لامنه خـذا القلـب منـزال
مشى طريق الحق و ابليس نايـم
و من لاعرف ربه في طيب الحـال
لابد وقت الضيق بالهـم هايـم
حتى صلاتك مع جماعات و رجال
في خيرها يا خوي نعم الغنايـم
و لامن نصف ليلك قم صفي البـال
ياعظم أجرك بين ساجد و قايـم
و لامن رفع ربي له كل الاعمـال
حسن الذكر لا قالوا فلان صايـم
و خلك شريف القصد ياطيب الفـال
سوء المقاصد فالبيوت الهدايـم
واحذر تبيع النفس في دب الأنـذال
وتتبع خوي ابليس راع النمايـم
النفس خيل لـك اذا كنـت خيـال
و من لاقوى نفسه قوته الهزايـم
ولاصرت ما تدري لويش أنت رجال
والله خسارة فيك ذبـح التمايـم
الشاعرة نوف بنت شطيط العتيبي
انتظر ردودكم 