[محمد العيدان]

سلطان الرومانسية عبدالله الرويشد
بلبل الخليج نبيل شعيل



هالإنسان عجيب بكل أحواله، ليه صار امعصب تشوفه حيل هادي، واذا كان هادي على طول تتنرفز على كل واحد يعكر مزاجه، أهو فنان أهو انسان أهو اكثر من هذا أهو على قولة محمد عبده: مجموعة انسان أهو أكثر يا بونورة أهو مجموعة فنان.
نعم ما يعترف أخيي بوخالد بلون واحد، الفن عنده ألوان الطيف من جذيه دائما نشوفه بفنه متلون وبعلاقاته الانسانية مع ربعه لا يمكن ان يتلون واضح بتعامله وراقي حتى بحواره مع اللي يعارضونه.
أهو عبدالله أهو الرويشد أهو بوخالد بكل عام وبكل اصدار جديد يبحث عن القمة، وليش اني أحبه بقوله كلمات تشرح نفسها:
يا وعد: في كل عام موعده مع جمهوره بألبوم عجيب.
يا صاحبي: لا تغير نهجك وخطك تراك في قلب الناس قريب.
أعز الناس: جمهورك يشوفونك أعز فنان لقلبهم.
ولا غيرك: يا عبدالله في فنه متلون.
هلا: فيك بين ربعك واخوانك.
مراسيلنا: دايما رسايلك لجمهورك محبة وشوق.
مجنونها رسمي: أكيد بتصير مجنون في حب الكويت.
عليك الله: يا بوخالد تعال ألو «الأنباء».
تغيب شلون: أي والله كله مسافر الله يهديك.
تصدق: صاير مثل بيض الصعو.
كل العناوين اللي قلتها فوق كانت عناوين أغاني عبدالله الرويشد في ألبومه الجديد ما راح أقول سفير الاغنية ولا الفنان الكبير كل اللي اقوله انه قمة في فنه وعطائه وليش ان القمة محد يقدر يوصلها الصدفة شاءت أني أدق على عبدالله وأهو على بعد 35 ألف قدم عن الارض على متن الخطوط الوطنية بعد رحلة عمل في بيروت وليش أني أمون على بوخالد صار هالحديث فوق الأفق:
سعود: مرحبا بوخالد الساعة المباركة اللي اسمع فيها صوتك.
بوخالد: ساعتك ابرك، منو معاي؟
سعود: افا يا بوخالد ما تعرف رقمي.
بوخالد: لا والله يا خوي بس انا الحين بالجو طاير على الوطنية من بيروت چاي الكويت، العفو منو معاي؟
سعود: معاك اخوك سعود الورع.
بوخالد: هلاااااا سعادين شلونك ياخيي ما نشوفك الا بالتلفزيون شخبارك.
سعود: بخير يالعود انت طمني عليك شلونك.
بوخالد: بحسن حال ربي يحفظك.
سعود: اشعندك في بيروت.
بوخالد: قاعد اجهز چم عمل جديد مع چم كليب.
سعود: توه نازل ألبومك ما يمدى.
بوخالد: «قل اعوذ برب الفلق» قول ما شاء الله يا خوي لا تحسدني.
سعود: في احد يحسد نفسه.
بوخالد: بعد عمري يشرفني شخبارك انت؟
سعود: انا بخير، قولي شلون صدى ألبومك الجديد في بيروت.
بوخالد: الحمد لله الامور طيبة.
سعود: بوخالد ودي اقولك شي بس مستحي امون ولا ما أمون.
بوخالد: تمون يا بوناصر قول.
سعود: منو اللي ينافس عبدالله الرويشد؟
بوخالد: الكل ينافسني.
سعود: ومنو الاقوى.
بوخالد: كلهم ربعي واخواني والمنافسة شريفة روح المنافسة يا سعود لازم تكون موجودة بس في النهاية كلنا نتمنى الخير حق بعض.
سعود: نبيل شعيل هل اهو منافسك الاقوى؟
بوخالد: بوناصر عن التخنبق.
سعود: جد بوخالد جاوب؟
بوخالد: يا سعود نبيل عديل الروح اي نجاح له نجاح لي وانت تدري بس الله يهديك اليوم فيك زغالة علامك؟
سعود: لا والله مو زغالة لان كل اللي قلته راح انشره باچر.
بوخالد: من صجك سعود؟.
سعود: اي والله من صجي شنو ما امون يا بوخالد.
بوخالد: تمون على الرقبة.
سعود: متى تجي «الأنباء»؟
بوخالد: قريب ان شاء الله «الأنباء» بيتي ما يحتاج.
سعود: أوكي يالحبيب ترد بالسلامة. بوخالد: الله يسلمك يالغالي.


http://www.alanba.com.kw/AbsoluteNMN...&zoneid=15&m=0