[جسووم]

من وجهة نظري ان مايحصل للفنان عبدالحسين عبدالرضا هو (( هبوط اضطراري)) .

دايما اسمع او أقرا عند البعض وخاصة من اللي موجودين في المنتدى الموقر ان عبدالحسين في الفترة الاخيره فاشل او مسلسلاته الاخيره فاشله

احترم الراي الاخر بس كلمة فاشل لفنان كبير قضى حياته بالفن ولاسعاد الجهمور تراها كبيره في حقه وعتبرها عيب تنقال لفنان له تاريخ عريق ومن ناحية مسلسلاته ما اعتبرها فشل .. اعتبرها هبوط في المستوى او (هبوط اضطراري.)

ليش قلت هبوط اضطراري ؟؟ .. خلونا نتفق ان اساس اي عمل هو النص .. هو الاساس اللي يتم البناء عليه .. أيام قبل أو ايام الزمن الجميل مثل ماتقولون كان الكاتب صديق للفنان .. كانو الكل تقريبا قريبين من سن بعض وكانت بينهم الغشمره والضحكه والميانه والجلسات والخاصه فكان الكاتب يعرف طبيعة كل ممثل من باب العشره بينهم .. فلما يكتب الكاتب النص كان يفصل الشخصيات تفصيل على كل ممثل ولان الممثلين كانو محدودين خاصة الابطال فكان الممثل يبدع تلقائيا .. اولا لان هو مبدع و ثانيا لان الشخصيه مفصله عليه تفصيل و غير الزيادات اللي يضيفها عبدالحسين .. فعشان جذي كان ادائهم دائما طبيعي و مافيه تكلف ..

بس الحين اغلب الكتاب شباب يمكن يكتب النص على شخصية وحده في العمل واللي هو البطل والباقي يلقطونهم بالواسطه وحتى لو يكتب على البطل تحصله ولا مره قعد معاه ولا شاف اسلوبه ولا شي .. يعني يا تصيب يا تخيب .. والاغلب الاعتماد على اداء الممثل من مسلسلات ثانيه مع ان كل كراكتر يختلف ادائه .. وعتبر هالشي من اهم الاسباب في تدني الدراما

فمثلا في درب الزلق الكاتب عبالامير التركي كتب فلم العاصفة 1965 بطولة عبالحسين و النفيسي و مسرحية هالو دللي 1974 و درب الزلق 1977 و حرم سعادة الوزير 1979 و ممثل الشعب 1985 و حامي الديار 1985 و دقت الساعة 1988 و هذا سيفوه 1989

يعني هالسنين كلها من الستينات لآخر الثمانينات وهو يكتب لهم و هالعشره اللي ذكرتها اكيد لما بيكتب هو عارف يكتب لمنو وكانو الممثلين موجودين ومستعدين .. بس الحين لو كتب نص لعبدالحسين عبدالرضا البطولة عبدالحسين وبعده بيتم البحث جاري عن الممثلين .. و المصيبه لو انكتبت شخصية على احد من الكبار وبعدهاا مامثل معاهم محد بيعوضه ..

مثلا العافو نزل في (هبوط اضطراري ) لان كلنا سمعنا ان النص مكتوب من زمان واكيد كان النص مكتوب على شخصيات كبيره ومنهم النفيسي ولكن شاءالله القدر ورحل النفيسي عن الدنيا .. ولكن السؤال المهم منو يعوض النفيسي في الشخصيه ؟؟؟؟؟؟؟؟ الجواب مستحيل في أحد لان النفيسي واحد .. منو يعوض سعد الفرج ؟؟؟؟ نفس الجواب لكن الشباب تقدر تعوضهم بأي شاب ثاني فهني لازم العمل مستواه بيهبط غصبن عليهم مب بكيفهم لان النص مب مكتوب للي مثلوه .

اخيرا .. بس هالسوال فكروا فيه .. لو واحد منا وقف جدام الفنان عبدالحسين عبدالرضى في مشهد هل بيقدر ياخذ ويعطي معاه ؟؟ هل بيفهمه من حركه او غمزه مثل ربعه الاوليين ؟؟ هل بنقدر انجاريه في الاداء .. ؟؟ ترى ايد وحده ماتصفق .. والعمل لعبة جماعية كيف تبونه يصفق بإيد وحده

فشي طبيعي هو بيكون في (هبوط اضطراري ) وليس فشل

عندي كلام كثير بس ماحبيت اطول عليكم والسموحه والعذر منكم