عرض مشاركة واحدة
قديم 26-12-2016, 01:23 PM   #4 (permalink)
زهرة البحرينية
المدير التنفيذي للشبكة الإعلامية
 
الصورة الرمزية زهرة البحرينية
 
 العــضوية: 3100
تاريخ التسجيل: 29/04/2009
الدولة: البحرين
المشاركات: 4,820
الـجــنــس: أنثى

افتراضي رد: طارق العلي "معاتباً" : لماذا يتجاهلون "جيل الشباب" لكي يشارك في الإحتفالات الكبرى ؟

مسكين طارق مايعرف شنهي الأسباب .. راح اجاوب بطريقة منطقية وبكل عقلانية .. نتطرق إلى حبة حبة .. ونجاوب على أسئلة مستر طويرق في المقطع و كلامه عن افتتاح دار الاوبرا واستقبال الملك سلمان في نفس المكان وما حصل ع دعوة وتم تهميشه ...

----------------------------------------
اولا: الواحد لازم يحمد ربه وانت يا طارق عندك مسرح وجمهور شغال وغيرك ماعنده ومثل عبد الحسين وحياة وسعاد والصلال و... ضروفه أبعدتهم عكسك انت فالجمهور مشتاق لهم وكونهم كبار فالكبار لا يعرضون إلا للكبار الامراء والملوك و ... وانت غصب تبي ترز الويه؟! عنبوو احمد ربك مو تقول عندك جمهور غفير ؟! .. هم تحسد غيرك على مشهد من عشر دقايق ؟! وتبي تكون مكان الكل ؟! ترى الناس ما تحب (رزه الويه) بكل لقاء طالع .. وبكل قناة طالع .. وطول السنة تعرض .. ومايمر رمضان إلا وعندك مسلسل .. وبكل مهرجان موجود .. وحتى في الحفلات الخاصة تبي تتواجد؟! .. وياريت عندك شي تطلع فيه للناس على هالكلام شنو عندك من قصص من قضايا بتقدمها؟! .. انت حتى كلامك باللقاءات ما تدل ع انك واعي و مثقف!؟


----------------------------------------
ثانيا: لو مثلا ديوان الأميري طلبوا منك تقدم مسرحية أمام هؤلاء الكبار سمو الأمير ووجهاء البلد .. بذمتك شنو بتقدم لهم ؟ بخيت وبخيته؟ لو الطرطنقي؟ لو الصيدة بلندن لو قلب للبيع؟ ... بتقول لاوالله هذا أمير بتقدم له شي راقي ؟! طيب هالمسرحيات الي تقدمها تعرض في اليوتيوب والتلفزيون يعني توصل للأمير وتدخل بيوت الملوك وهم ع علم بمستوى طرحك ومستوى فكرك وعندهم علم بالانحطاط والتفاهات واكيد عيالهم واحفادهم يتابعون .. بس هل انت حاسب حساب لهم أثناء ما تكون عن الخشبة؟! ...

إذا أنا زهرة العادية مستوى فكري بسيط وحيالله موظفة عادية .. لاني صاحبة منصب و لا اميرة ولا وزيرة وثقافتي ع قدي .. ومع ذلك اشمئز من عروضك وطرحك للتفاهات ما يوافق مستوى فكري وذوقي مع اني عادية لا فيلسوفه ومع ذلك أعمالك أقل من مستوى فكري بالف مرة ... انا كبر بنتك واحسك كبر حفيدي .. مستوى أعمالك ما ترقي لمستوى راقي حتى الصغار يستصغرونك .. إذا طالبنا بمسرح هادف .. قلتو الجمهور الحين اختلف عن السابق ومحد يبي مسرحيات هادفة يبون يضحكون وبس ... طيب بذمتك الامير والملك تعتبرهم يبون يضحكون وبس؟! طبعا لا .. اهما محتاجين مسرحية تنسجم مع مستواهم الفكري والثقافي .. انت ما تحسب حساب لهم .. وهذا أجبرهم يطلبون أفضل الممثلين أصحاب الفكر الراقي أو الي يحرصون ع تقديم المضمون وهذا مو موجود عندك انت حصرت نفسك للفئات السطحية ..


ترى انت ما تعتبر من أفضل الممثلين ماراح تصدق وهذه مشكلة انت وحاشيتك ما يفهمها لأنها أكبر من مستواكم ... مو كل من له جمهور يعتبر من الأفضل .. ولا كان أصبحت شوجي والصفي والحملي والعمر والبلام كلهم أفضل ممثلين لأن كلهم عندهم فانزات مثلك .. وكلهم عندهم جمهور مثلك .. وكلهم عروضهم فل مثلك .. يعني انت حالك حالهم >> وصح انكم تشتغلون سنويا وعندكم إقبال لكن كل هذا مو دليل نجاح وهذه مسألة هم ماراح تفهمها لإنها أكبر من مستواك
----------------------------------------
نعم انت تفشل .. لان فكرك محدود وسطحي.. و ما تعبر نجم دسم .. إذا قارنت نفسك ب عبد الحسين و النفيسي بتعرف انك صفر أمامهم (لما كانوا في سنك) .. اهما مااخذوا الفن ضحك والسلام وهذا كلام هم ماراح تستوعبه ... سهل جدا انك تقدم مسرح راقي و نظيف وتتطرق لقضية تخص أزمة حالية وتستغل القمم العربية أو اجتماع رؤساء وزراء الخليج أو.. / عبد الحسين كان يقدم مسرح يواكب الأزمات وطرح يناسب كل الفئات مثل مسرحية فرحة امة خصصها للحكام الخليج وتمكن من جمع حكام الخليج وكلهم حضروا (ماطبوا منه لا .. هو طلب منهم) استجابوا له لأنهم واثقين انه بقدم شي يليق في مقامهم .. لكن انت تتوقع بيستجيبون لك؟! انت حتى الوزراء ما بيعطونك ويه ... بدليل حتى دعوة ما يدعونك .. عرفت مستواك؟


----------------------------------------
لو يجتمعون الحكام في بيت اي فلان و طلبوا منه يدعوا فنان يلطف لهم الجو بذمتك بيدعونك؟! ناقصين فشيلة؟! إذا إذا الفلان طبل ومن طقتك هذا موضوع ثاني لكن بصراحة انت فعلا تفشل .. تخيل واحد من هالامراء والملوك او شيوخ دين او او وجهاء البلد أو شخصيات ثقافية طلبوا منك تطلعهم ع لقطات من مسرحياتك شبتوريهم؟! >> فرحان وهو بحضنك وتلبسه حفاضة وتكب عليه فودر ؟! لو مشهد تضغيط ع شهاب وأمه الإيرانية؟! لو مشاهدك مع الخوال لو على كوميديا بروك المانع لو مشاهد احمد الفرج وهو محشش؟!
----------------------------------------
انت لازالت قادر على تقديم شي نظيف .. احرص على تقديم شي راقي عشان اذا صارت مناسبة كبيرة وراقية فيها شخصيات كبيرة واهل رقي تكون أول المدعووين ، لاتصدق عمرك انك وصلت القمة ولا تتوقع بعد ما يرحلون الكبار (بعد عمر طويل) انك بتكون عملاق مكانهم ؟! >> ترى الأمراء وكبار الشخصيات كانو يحضرون المسرح وأمير البحرين السابق كان يطلب المسرحيات الكويتية تقدم بالبحرين وأغلب الحكام يتصلون لعبدالحسين وسعد ويطلبون منهم يقدمون يحضرون دول الخليج ويتكفلون بالإنتاج وأغلب الوزراء والحكام سابقا كانوا يدعمون لكن بعدما رحل من رحل وتوقف الأغلب عن المسرح .ِ. يعني اذا راح عبدالحسين و حياة وسعاد والصلال والنبهان ... لا تعتقد أنك بتتسيد مكانهم >> عبد الحسين عملاق كبير منذ الستينيات و لما كان في عمرك كان يقدم لاكبرها واسمنها وأغلب مسرحيات عبدالحسين برعاية الشيخ صباح وحتى افتتاح دار الأوبرا كان بطلب من الشيخ صباح وفي لقاءه معهم طلب من عبدالحسين وسعد العودة معا ... لكن انت يحضي تتوقع لو قابلت الامير او وزير او ملك تتوقع بيطلبون منك ترجع مع هيا؟ أو مع أوالبلام؟! >> عرفت مكانتك الحقيقية لو بعدك ؟


----------------------------------------

أتمنى اني وفقت في الإجابة على أسئلتك .. صحيح اسلوبي حاد ومهما كان غير مقبول لأن فيه شدة .. لكن انت ماعليك من أسلوبي خذ الإيجابية بالموضوع ، اتمنى تكون فهمت واستوعبت ؛ إذا استوعبت بينصب كل هالكلام لصالحك وانت المستفيد الأكبر ، قدم شي عدل قبل لا تفارق حياتك ، إذا مات الإنسان ما تبقى له إلا أعماله/ لا تتوقع الناس بتذكر انك ضحكتهم فقط ترى وايد بالمجتمع دمهم خفيف ويضحكونا لكن في المقابل اهما ما قدموا شي مشرف لوطنهم أو عمل يبقى لسنوات أو عمل مؤثر إيجابيا في مجالهم .. ماكو بصمة تخلينا نفتقده ونحس بثقله ، يخي ماراح نطالبك تكون مثل الكبار على الأقل قدم في مستوى أعمال الإماراتي النغموش او القصبي على الاقل .. طرح راقي يواكب العصر مغلف بكوميديا راقية بس هذا صعب عليك؟! >> لو فقدت الإمارات النغموش بنشعر أن الفن الإماراتي خسر رمز و بدونه فن الإمارات يتيم و السعودية أيضا رغم أن القصبي مقيم خارجها لكنه في الغربة يقدم أعمال تخدم وطنه ورافع مستوى فن السعودية وهو خارج السعودية >> لكن انت من بيفتقدك؟! غير الجمهور الي على شاكلة بروك المانع وسلطان الفرج و بقية الشلة >> طالع لي بلقاء تتشره ماخذوني .. ماعطوني ويه .. مايبوني .. أكبر شوي صكيت الخمسين و تصرفاتك وكلامك مثل اليهال .. كان من ياهل يتشره ع أمه إذا ما شرت له حلاو ولا أخذته الملاهي مثل إخوانه ... 😂

 

 

__________________

 


ZaHra_BaH2

زهرة البحرينية غير متواجد حالياً   رد مع اقتباس
 
7 9 244 247 267 268 269 270 271 272 273 274 275 276 277 278 279 280 281 282 283 284 285 286 287 289 290 291 292