[الفن الجميل]

قادتني امس الصدفة انا اروح "قراند افنيو" الساعة 5 مساء لتقودني ايضًا الى قاعات السينما الموجودة هناك طبعًا انا طبعي شوي انعزالي ما احب الاماكان العامة وفيها تجمعات كبيرة مثل هالمجمع يعني بالعادة ما أروح إلا بأوقات الهدوء صباحًا، طبعًا حبيت ادخل فيلم واحجز تذكر دام يت وصار الي صار تقريبًا قلت حق راعي التذاكر شنو الفيلم الي ينعرض حالًا قال "فلاشر" قلت فوقها طبعًا توقعت انه فيلم امريكي ورعب خذيت تذكرتي ورحت القاعة (7) كانت توها بدت الدعاية حق الفيلم طبعًا دعاية اعتقد تجارية مالها أي علاقة بالفيلم، شوي والله الصدمة يبدأ الفيلم والله طلع الفيلم عربي شوي ويطلع كويتي !! شويتين والله بالخط العريض "عبد الله السلمان" في "فلاشر" اهني الصدمة طبعًا ندبت حظي وقلت الحين صارلي مدة مو داش سينما ولم دشيت اول فيلم لعبد الله السلمان (صاحب قناة فلاش )<< الي كنت احبها حيل بس لحد يدري ههههههه

شوي والله الاسم الثاني منو تتوقعون؟


صح


وصلتوا خير

(بو خرشد) طبعًا هالانسان صج انه يتعرض حق نقد على اسلوبه بالتقديم بس اعرف الشخص من نظرتي له (بوخرشد جدا جدا جدا طيب وقلبه كبير وحنون) بس لو يغير من اسلوبه بالتقديم

المهم ثالث اسم منو


"نواف النجم" طبعًا نواف النجم فعلا كان "نجم" بفترة من حياته ايام مسلسل الخراز والداية بس الحين انطفى نجمه وصار يأخذ ادوار ثانوية مادري ليش هل هو محارب اما لا انا اشوف انسان محترم وتمام طالما ان ام سوزان تحبه ومحافظة عليه من 14 سنة << حياة تحب الناس الطيبة

رابع اسم هو دنجوان الشاشة الأهوازية واليمنية والكويتية والخليجية وبتاع كلو "فهد باسم" ...

بدأ الفيلم ومازلت اندب بنفسي لاني توقعت اني راح اشوف فيلم ساذج وملل وكله قطات بايخة مثل افلام السلمان الاخيرة لكن شوي شوي تحمست من وتيرة الفيلم كان شغل مضبوط ومتقن هالمرة عكس المرات الفاضية>> ما راح احرق عليكم الفيلم ما راح ادخل بتفاصيل ... بس الفيلم هذا خيب ظني فعلا كان ممتاز وحلو وحماسي واعطيه 7 من 10

والحلو بالموضوع ان فهد باسم ماله مساحة وظهور وكبير بالفيلم وايضًا نواف يعني عطوهم حجمهم الحقيقي والي يستاهلونه

لكن الي غثني هو دلع الممثلة "انوار" ونطقها للكلام بشكلة مستفز صايرة نسخة "هيفاء وهبي" بس على جكر ههههههه ما انسى جملتها امس "حااااذذذر يووووباه" طبعا الجملة الي المفروض تنقال "حاضر يبا" بس هي عفست ام اللهجة بدلعها البايخ


انا من ناحيتي انصحكم تشوفون الفيلم لأن حماس والأحداث تشدك وتخليك بحيرة


طبعا التقييم حق الممثلين


السلمان 8 من 10

بو خرشد 5 من 10

نواف النجم 5 من 10

فهد باسم 4 من 10

علي بولند 2 من 10

انوار 1 من 10

حسن ابراهيم 10 من 10

ممثل راعي الونش 5 من 10

الممثلة دور المحققة الجيكرة ما اعرف اسمها 6 من 10