[محمد العيدان]

بسولف لكم سالفة او حكاية عن رحلة عذاب تبدأ عندما تصل اليكم بطاقة مزخرفة وجميلة مكتوب بها هذه العبارة المألوفة " نتشرف بدعوتكم لحضور زفاف ولدنا ...... وابنتنا ...... وممنوع اصطحاباالاطفال بأمر من ادارة الفندق وكذلك يمنع الدخول بالتلفونات ذات الكاميرا .." طبعا من هذه اللحظة تنعفس البيوت ويصير فيها حالة استنفار عجيب غريب .. وينزل خير ورزق مفاجيء للخياطين .. ومن الخاسر الاكبر من هالعرس ؟؟ طبعا ماكو غير الزوج المقرود ..

واليكم هذا الحوار الهادئ بين الزوج وزوجته :

الزوج : يا بنت الحلال الاسبوع اللي فات كنتي لابسة نفنوف جديد .. ليش تبين واحد ثاني ؟؟
ترد الزوجة بكل قوة : انت شتبي يقولون عني ها ..؟؟ بخيلة .. او ماعندها ؟؟ كلهم راح يلبسون نفانيف جديدة .. وتبيني اروح بكشاميلي وخلاجيني هذي .. عشان تتشمت فيني الزينةوالشينة؟؟

وبعد هالحوار الهادئ يرضخ الزوج المسكين لطلبات الملقوفة .. عفوا .. اقصد زوجته ( مو لانه سكانه مرته ) لا .. عشان مايبي عوار الراس والحنة والرنة وطبعا احنا يالرجاجيل كلنا جذيه .. وطبعا بعد مايخلص من موضوع النفنوف او الفستان تطلع سالفة ثانية .. وهي وين يخلون العيال ؟؟ عند امه يروحون العيال او عند امها ؟؟ .. واليكم الحوار الثاني الهادئ :

الزوج : العيال وين نوديهم ؟؟
الزوجة : نوديهم عند امي ..
الزوج : امج عجوز وكبيرة بالسن وزين تعابل بنفسها وين فيها شدة على العياال؟
الزوجة : شوف لا تقعد تربرب وتطنز اذا مو عاجبتك امي ..انت اقعد عندهم ..
الزوج :خوش حجي ولله .. انتي تروحين العرس وانا اجابل العيال .. مو قالولج انا سلانية امج ..
الزوجة : كلام زايد ماابي رجاء .. ماتبي تقعد عندهم ودهم عند امك ..

وتصير حنة ورنة ونجرة على هالموضوع وآخرتها يقعدون العيال عند ميري الخدامة وتطلع الزوجة معاه بالسيارة وهي عاوية بوزها ومادته مترين .. ووصلت اخيرا الى صالة الافراح ..
وطبعا هناك بصالة الافراح حدث ولا حرج .. ممنوع دخول الرجال لانها خاصة للنسوان فقط اللي اغلبهم محجبات او منقبات ولكن في ليلة العرس الوضع يختلف .. يبون يطلعون مواهبهم بهالليلة ويحطون حرتهم باللبس القصير والعاري وطبعا داخل الصالة لا يوجد اي رجل الا المعرس جالس على كرسيه كأنه هارون الرشيد والنسوان طبعا فاصخين حجاباتهم وقاطين نقاباتهم وطايحيله ردح ورقص على موسيقى الدي جي واذا قلت لهم : ليش قاطين حجاباتكم المعرس موجود؟؟ تأتي الاجابة السريعة : المعرس عادي لان زوجته يمه وهي عامية عينه بهالفترة atch_lf: .. وطبعا ناسين ان الحفلة تتصور فيديو .. صحيح ان التي تصور امرأة ولكن الشريط سوف يتسرب من يد الى يد ومن بيت الى بيت وطبعا نسخ الى اهل المعرس ونسخ اخرى الى اهل العروس والكل راح يشوف .. وطبعا اخذ يا فضايح .. لكن مو مشكلة فيديو ما يهم ...

وطبعا بالحلفة اهل العروس جالسين بجهة واهل المعرس بجهة اخرى .. وطبعا اخذ حش بالمعرس شوفوا خشمه شلون صاير .. او شوفوا شواربه شلون قاصهم .. وقرض بالعروس شوفوا فستانها بوطقة .. وليش صايرة خفيفة ماتركد .. او ليش مبوزة الظاهر غاصبينها على العرس .. وطبعا من هالكلام .. وهذا غير .. هذي زعلت ليش ما جلست بالامام عند الكوشة .. والثانية مادة بوزها لان الدي جي الخاص بالاغاني ماحط اغنيتها المفضلة عشان ترقص عليها .. وطبعا الناس اللي جايين العرس اكثر من الكراسي المخصصة .. ولاننسى الزفة المصرية بقيادة فرقة حسب الله عشان يجنون اكثر واكثر .....
اثنين يتزوجون والفين ينجنون .. يلا ليلة بالعمر .. وتشوف بالعرس اهل المعرس الام ترقص ..والاب يطق رقبة .. والخالة تطق اصبع .. والجدة قاعدة تترقص على الكرسي ( ماتقدر تقوم معاها روماتيزم بالمفاصل ) atch_rir:.. وتشوف المعرس عمره 19 والعروس عمرها 18 .. يعني اثنينهم جهال .. وتدبسوا بالزواج المبكر لان اهلهم يبون يزوجونهم عشان يشوفون عيالهم والنتيجة من هذا كله ؟
طبعا هواش ونجرة وبعدين طلاق وزيادة عدد المطلقات بالمجتمع ( اللي يا كثرهم )
وبعد ماتنتهي العفيسة .. اقصد الحفلة تشوف اغلب المدعوين يقولون ويتحلطمون : والله لو ندري ان العرس جذي ماجينا .. مو حلو ويلوع الجبد والبوفيه اي كلام .. وحتى ماي ماعطونا .. وهم تلقاهم ماكلين وطافحين لأسبوع جدام ...... انشالله اعجبتكم السالفة ؟؟؟؟؟؟؟؟