[جنون أنثى &&]

حوار / هاتف «الراي» من مشفاه التايلندي
ولد الديرة: كل ثلاثة أشهر تظهر لي أورام سرطانية جديدة


خالد العقروقة مع محمد لويس واثنين من معجبيه في المستشفى التايلندي


|كتبت ليلـى احمـد|

من مشفاه في تايلند حيث يتلقى العلاج الكيماوي مرة ويجري العمليات الجراحية لاستئصال الأورام السرطانية مرة أخرى والتي يكشف له الاطباء هناك بجديد الأورام التي على حد تعبيره «تطلع كل يوم مثل الفقع» هاتف الفنان خالد العقروقة - ولد الديرة - «الراي» ليعبر عن غضبه لما يراه من أحوال الكويتيين المرضى الذين يلتقيهم في المستشفى التايلندي.
ولد الديرة يملك طاقة ايجابية هائلة على حب الحياة وهي التي تصبره على تحمل المرض، كما تطغى على نفسيته حال دائمة من المرح والسخرية على الاوضاع العامة وحتى انه «ينكت» على نفسه.
شهور عديدة قضاها خالد العقروقة في مشفاه التايلندي ونبقى على تواصل دائم، وهذه المرة حدثنا ولد الديرة الذي كان تحت تأثير العلاج الكيماوي وقال ان الهدف هو تصغير حجم الأورام السرطانية ليكون مؤهلا لاجراء عملية جراحية جديدة لاستئصال ما تبقى منها في جسمه.
وبدلا من ان يلتفت لحالته الصحية الصعبة بدأ خالد بالحديث عن أخطاء العلاج بمستشفيات الدولة في الكويت والتي «ودرت» الكويتيين واضطرتهم للسفر الى تايلند لتلقي العلاج في مستشفياتها وليكتشفوا «بلاوي التشخيص الحكومي».... ولنحافظ على عفوية الحوار ننشره باللهجة المحلية كما حدث بين «الراي» والفنان خالد العقروقة... وهنا التفاصيل:

• أخبارك... يا عسل!
- اخباري خابطة والرؤية مو واضحة.
• أفاااااااااا... ليش؟
- من اللي أشوفه.
• قبل لا تقول عن اللي تشوفه... «خلنشوف» أخبار صحتك؟
- قبل ثلاثة أشهر اكتشفوا أوراما سرطانية جديدة في معدتي... مدري ليش هالمرض الخبيث حابني وااايد كل يوم يطلع بجسمي أورام يديدة مثل الفقع.
• أوووووف... له له له ماتشوف شر!
- الشر شفته وعفسني... تذكرين اشكثر كنت حلو «نضحك» كنت اشبه نيلسون مانديلا، والحين اخذ جرعات الكيماوي فصاير لوني رمادي كني سمادة زرع، ونزل وزني... لو بدال هالأورام اللي مثل الفقع تطلع لي آبار نفط مو احسن لي «وضحك».
• النفط... للحكومة؟
- وانا مواطن حكومي بس مع الاسف بقولها «أشكره» انه راح زمان «الرياييل»؟
• يا رجل اتقى الله أشكثرهم والله قاعدة أشوف صورهم بالجرايد!
- تشوفين أشكال مو أفعال.
• امبله أفعال، كل يوم عندنا خير كثييير... استجوابات والاطفاء يطفون الحرايق وغيره.
- زمان ابوي وابوج راح.... كانوا رياييل قول وفعل مو مثل الحين.
• شنو هالغضب... شنو This؟
- الـ This (هاهاهاهاها) ان وايد مرضى كويتيين حاسبيني سفير شعبي في تايلند وكل من عنده مشكلة ياني.
• ووين مقر سفارتك سعادة السفير...؟
- في المستشفى أشوف بلاوي... ريال مقطعين اصابعه بمستشفى بالكويت على بو «غرغرينا»... يا حب اطبائنا للتقصقص، كل علاج الغرغرينا يطيحونله تقصقص بالبشر ماعندهم غيره.
• كأن علاج الغرغرينا هو قطع الاوصال البشرية لان الكويتي متطلب فيقصقصونه عشان يصير نص كويتي ويلهى بحاله ويقصر لسانه.
- «يضحك» اذا هذا هدفهم عيل حققوا اللي يبونه، تعالي شوفي المقصقصين بالمستشفى بتايلند، الغرغرينا مستويات مو كل شي في جسم الأدمي يقطعونه، هذا الريال اللي «قرمو» أصابعه بالكويت وذاك «قارمين ريوله» وثالث «ايدينه وريوله» كلهم صاروا معاقين جنه طالعين من حرب عالمية، كل هذا بفضل «حكمة» أطبائنا، لما يشوفونهم الاطباء في تايلند يقولون حرام عليهم في الكويت سوو فيكم جذيه، لان لهم علاج بالادوية والعقاقير ليش نتفوكم... «واشتد غضبه» بالله عليج هذي حاله كل اللي اقابلهم من المرضي يايين تايلند نتيجة لأخطاء التشخيص في مستشفيات الحكومة او مستشفيات التجار في القطاع الخاص، وانا منهم سنة ونص فيني أورام يقولون «قولونك متعفس... ليش هذا قولون والا كودري»... ومستشفى ثاني يقول لي التهاب بسيط في الامعاء. وهات يا أدوية وانا «ابولع» فيهم. حتى كبرت أورامي... كانت مثل «التيل الصغار» صارت في جسمي كرة المونديال مالت كأس العالم، والسبب كله «تشوت» فيني من مستشفى لمستشفى وكلهم تشخيصاتهم غلط.
• لما زرتك في مستشفى مكي جمعة كنت تتلقى علاج صح... يعني في شي زين عندنا!
- هم ماسكروا جرحي وعالجته بتايلند، وأكيد «تحسفو» يستأصلون كل الأورام فيني والنتيجة كل يوم نابت لي ورم جديد.
•... هذي الكويت صل على النبي؟
- اللهم صلي وسلم عليه، آنا وغيري من الفقارى حاطينا للتجارب ما نثق بمستشفيات الكويت اللي حرولوني قمت بعت سيارتي ورحت تايلند على حسابي وعقبها «الراي» وقفت لي وقفة رياييل أول وتحولت أوراقي للجنة العلاج بالخارج.
• وهم طلعت لك أورام هناك بالرغم من وجودك لأشهر في المستشفى التايلندي... أليس لديهم خنبقات يا ولدي كما عندنا؟
- اللي أنا فيه نتيجة انهم ما لحقوا عليّ بالكويت وماعالجوني صح... فاشلون أترك لهم عمري... العمر مش بعزئة يا ست لولا.
• اشلونك الحين... هل مرتاح من أداء لجنة العلاج بالخارج... جنهم زينيين؟
- «ضحك» مع الناس البلايا زينين والناس اللي مثلي وشرواج حدهم شينين، احنا لنا التجارب في مستشفيات الحكومة، لجنة العلاج بالخارج محددين لي الصرف الحكومي لأربعة أسابيع لاحظي... مو شهر... طيب بعض الشهور 31 يوما... من يدفعهم... يدّي والا المرحوم أبوي اضطر انا ادفعهم، وكل شهر يبون تقرير طبي.
• عااااااااد يا خالد هذا حق عشان «يطمئنون» على سير العلاج ويستمرون في الدفع لتغطية التكاليف!!
- حق ونص... بس حتى يوصل التقرير الطبي من المستشفى التايلندي الى السفارة الكويتية في تايلند اللي يطرشونه حق وزارة الخارجية بالكويت وحتى الاخوان بالخارجية بالديرة يفتحون الحقيبة الديبلوماسية يقرونه «بتمعن» وعقب يطرشون التقرير لوزارة الصحة عندكم، وخذ عاد روتين وبطيء حتى يروح للجنة العلاج بالخارج، ويقرونه و«يتمقلون» فيه و«يخزونه» زين حتى يطلعون الموافقة وتروح لوزارة الصحة لاستمرار علاجي بتايلند، ويرجع يلف نفس اللفة للخارجية وللسفارة الكويتية في تايلند ووصوله للمستشفى... شوفي كم يوم يضيع عليّ محد بيعجل بموتي الا لجنة العلاج بالخارج ووزارة الصحة الكويتية هذيل بيودوني مقبرة الصليبخات قبل يومي.
• بعيد الشر... انت عشان «تحرهم» خلك صامد!
- بس النتيجة اني أتأخر كل شهر عشرة أيام عن أخذ جرعات العلاج الكيماوي وأكثر، وأيام الاحداث السياسية في تايلند كل شي تسكر فتأخرت شهر ونص، وهذا اللي يطلّع لي كل يوم أورام سرطانية يديدة لان هذا المرض ما يتحمل الصبر والروتين الحكومي.
• خالد على جذيه باين ان الامور... طينه!
- لا... تطمني مادام الكويتيون حولي بتايلند والسفير والقائم بالاعمال ما يقصرون وياي هذيل ما عليهم خلاف بس الخلاف على روتين وزارة الصحة اللي مطلعة روحي، تصدقين أعرف ناس تأخرت أوراقهم لاستمرار علاجهم في فرنسا لمدة شهر ونص، ولما وصلت الاوراق كانوا داشين العناية المركزة الله أكبر ليش جذيه يصير فينا.
• شخبار وفاء أهل الفن هل يتواصلون وياك؟
- وهذا بروحه بيطلع لي أورام يديدة... الله أكبر عليهم... وين اللي اشتغلت وياهم سنين وبنين طويلة وبينا عيش وملح ليش مستكثرين عليّ يرفعون التلفون ويكلموني، وين هالفنانين اللي رزيت ويهي وشلتهم من أزماتهم، انا ما أبيهم يتكلفون يزوروني بتايلند، ابي اتصال من واحد من هاللي اشتغلت وياهم أو اللي ساعدتهم واشتغلت لهم مطراش عند هذا الوزير وذاك، مستكثرين علي اتصال تلفوني، الله يا الدنيا، ماكو الا أهل الكويت اللي يتواصلون وياي واللي أطلب منهم الدعاء لي واقولهم «دعواتكم يا أهل الكويت «وانتوا أهلي وعزوتي ما استغنى عن دعواتكم من رب العالمين عشان يطلعني من أزمتي الصحية».
• من هم الأوفياء العسوليين الطيبين من الفنانين؟
- اللي يتواصلون معاي طول الوقت بذكر اسمائهم وكثر الله خيرهم واللي ما أذكرهم فهذيل علاقتهم مقطوعة مع الوفاء...ومعاي.
• ممكن نعرفهم؟
- الفنانون القديرون حياة الفهد وغانم الصالح وعبدالله الحبيل و«عيوني» الدكتورة فوزية الدريع و«أمي» عالية حسين وصادق الدبيس و«بوخدود» عبدالله العتيبي وخالد الراشد وشمعة من سلطنة عمان ومحمد لويس عندي بتايلند وانت اختي حبيبتي ليلى أحمد من «الراي».
• شخبار علاقتك مع الفن؟
- من جم يوم زارني منتج يبي يسوي برنامج كاميره خفية في تايلند وانا المذيع اللي أسوي الدقات في الناس وقال انه بيعطيني ألف وخمسمئة دينار على الحلقة الوحدة، بس وين أقدر وأنا مريض بهالحالة أطلع من الكيماوي وادش غرفة العمليات وحتى لو تحاملت على نفسي وسويت الحلقات وين الله بيفكني من لجنة العلاج بالخارج اللي يقولون (نصرف على مرضه وقاعد يسوي برامج... يبا صكوه بتقرير لوقف الصرف على علاجه ما دامه عنده فلوس)، ولاني ولد ناس عادية مو من هالبلايا اللي يتعالجون بفرنسا ولندن واميركا وماعندي واسطة راح يقطعون عني مصروف العلاج مثل الورد، بينما البلايا يروحون للسياحة بكل دير الدنيا على حساب لجنة العلاج بالخارج.
• معقووووووووووووووووول خلّووووووووووووووووود كل هذا؟
- اي يبا خذيها مني كاش... معقول ونص... قبل لا اطيح بهالمرض الحبيب «اللي ترافجنا انا وياه وقاعدين نلعب توم وجيري نطارد بعض... انا بجرعات الكيماوي وهو يركض عني بعيد ويطلع بمكان يديد»... وين الله بيفكني من الحساد اللي بيطقوني عين «أرض أرض» ويقولون ول عليه... ثاني يوم انا «مفنقش».
• يااااا ربي... ماكو خبر نص حلو؟
- امبلا أكو... أنا احلى اخباري تطلع كوارث وطنية «نضحك» بس يالا خل أهدي اللعب... قبل مرضي وسفري لتايلند كنت موقع عقد مع احدى شركات الانتاج بالكويت عشان اسوي برنامج، وايامها اخذت منهم قرض وظليت أسدد فيه، بس ما صورت البرنامج بسبب المرض والحين علي حوالي ألف دينار ماعندي أدفعهم «يضحك... شفتي أخباري الحلوة» وهم بصراحة كرماء في صبرهم علي، تدرين انا لا راتب ولا «عماة عين» ولا دعم عمالة والله يقدرني على تسديد ما تبقى من القرض المستحق لهم.
• خل نغير جوك الكوارثي... خالد هل تتذكر أعمالك المسرحية؟
- ولا يمكن أنساها لان المسرح يحطك بويه الناس، وتشوف ردود أفعالهم فورا وبسرعة تحسهم «توهم طالعين من الفرن» وتقابل هالعالم عقب العرض المسرحي ونسولف ونضحك، الفنان المسرحي ينتشي بالناس، وعندي حنين للوقوف على خشبة المسرح مرة ثانية، وودي اشوف أهلي الكويتيين حولي، والحين عندي نص مسرحية كاتبها صديق كويتي عن اوضاع الكويتيين في تايلند اسمها «راح زمان الرياييل» وودي ان شاء الله عقب ما اصير زين، وأرجع الديرة بالسلامة ابي أمثلها لأني عايش هالاوضاع وشفتها بعيني محد قالي، واذا الحكومة ما رضيت تعطيني مسرح، والله راح أمثلها في أي مكان... بالجزيرة الخضره أو كلش كلش في ساحة دوار العظام «نضحك».
• أعرف انك سريعة البديهة في التأليف... ماذا لديك من جديد؟
- لحقي صرت شاعر... عندي بيت شعر... كتبي عندج:
قانون بويهين يشوي الفقارى شوي
وقانون ناعم يبتسم لى شاف واحد قوي
انت تبوق بيضة بالسجن تنقط
وغيرك يبوق الملايين ويمر عليك شخط
قانون الغابة حطوه الذيابة


http://www.alraimedia.com/alrai/Arti...&date=22062010