[روائي]

السلام عليكم ورحمة الله وبركاته

ملاقات هي مقالات صريحه قد تكون طريفه للبعض وقد تكون محزنه .. وقد ينطبق عليها المثل اللي يقول :شر

البليه مايضحك "


لذالك ينبغي عليك عزيزي القارئ ان تتعلمو انواع القراءه … اي قراءة السطور ومابينها وماوراءها فهناك معاني مدفونه في كل كلمه ..






الخط السريع لازم يصير وسيع والناس تطول بالها ولا راح تضيع…!

يالله على شوارعنا انعم واكرم وخصوصا الصبح على الطريق العام والواحد رايح دوامه كل يوم فيلم .. يعني صراحه اتعجب على اللي يسوق وهو يتكلم بالتلفون ..؟؟ يعني حبكت ؟ اصفط على اليمين ولا اجل مكالمتك لما توصل .. لاتعرض حياتك وحيات الاخرين للخطر .. بعدين عفيه نفس على اللي تحط ميك اب يعني حتى العروس بليلة زفافها ماتحط كل هالمكياج؟! والعن يومج متى مداج تحطين كل هالمكياج ؟؟؟ ولا مسكينه ما اسعفها الوقت فا كملت جلسة المكياج بالسياره .. ومو هامها احد بالشارع وحاطه ستين ابره براسها ؟ شنو قنفذ مثلا ؟
ولا الحبيب وعليه عليه سيارته هونده مجكنمه وصاير بين باصين مدرسة! وقاعد يقرا مجله ؟؟ يعني شنو بيكون موقفك لو الباص اللي جدامك لزم بريك؟؟ بتصير السياره مزلاج وانت بتصير غلاف للمجله ..

واللي ياكل واللي يغازل واللي يدخن عالصبح وعلى الريج عفيه نفس عليك ! ويبط جبدي اللي يبتون ؟ ويتخطرف بين السيارات جنه سوبر هيرو ولا سوبر مان ؟! محد قالك اقعد متاخر لو تقوم اشويه ابجر ماراح تصادفك زحمه .. وتشوفه يحذف يمين ويسار ومساكين العالم مايدرون وين يروحون والله تلاقي الواحد على يمينه ويساره سياره وهذا وراه يبيه يفتحله الطريج شيسوي يعني ؟ لا هون ولا هون ؟؟ والحبيب يدق هرن وراسه صاير فرن يبي يوصول ومايبي احد جدامه مايصير !! بالهداوه على قولت سلمان حميد ..
اما الشايب وعليه وايد نظامي تعالوا شوفوه لدرجة اذا واحد بالحاره الثانيه لزم بريك اهو بعد يمسك بريك لووول شكو مادري يا عمي الشارع جدامك فاضي امشي تحرك ؟؟ بالحاره اللي بالنص وتمشي 40 ؟؟؟ مايصير وراك عالم يدعون عليك ... وانت ريلك والقبر .. ولابس هالاحزام ورابطه على ارقبته وعيونه طالعه لي بره جنه ضفدع ... ولا يهالوه صغير شواربه مو خاطه .. يسوق سياره ولابس غتره ومسوي جريمبه يعني تمويه .. وهو ريله ماتوصل للبانزين ...!

وزحمه مالها اخر ... الساعه 6 ونص والشارع واقف ؟؟ متى اطلع مثلا؟؟؟

يا ترى لو انه شوارعنا اوسع مما هيه عليه هل كانت هناك مشكله من الاساس ؟؟ شوارع صارلها عشرين سنه ماتوسعت؟؟ وعمرها الافتراضي انتهى !! ليش مايوسعونها ؟؟ ماحسب حساب لتزايد مستخدمي الطريق ؟؟؟ كل سنه فوق عشرت الالف شخص يطلع رخصة سوق ... ؟؟ الله يستر من الياي !!



ومن الشوارع لرجال الأمن !!!!


قبل لا ادش في الموضوع أبي أوضح مفاهيم وأساسيات من باب التهيئه والتمهيد

في البداية راح نعرف ...
الشرطة هي أحد الأجهزة الموكل إليها حفظ الأمن في أوقات السلم حيث أنها من الأجهزة المدنية. تتكون الشرطة من عدة شعب منها : شعبة مكافحة المخدرات، المرور، الأمن العام، التدخل السريع... الأطر البشرية في هذا الجهاز هم الضباط، ضباط الصف، والمتعاونون. ينتمي هذا الجهاز غالبا إلى وزارة الداخلية. ومن إهم واجبات جهاز الشرطة:
• منع الجريمة قبل وقوعها.
• اجراء التحقيقات اللازمة للكشف عن مرتكبي الجرائم في حال وقوعها.
• احالة المجرمين بعد انتهاء التحقيق إلى النيابة العامة.
• ملاحقة تجار المخدرات ومتعاطيها والمروجين لها.
• تسهيل حركة السير في الشوارع والمفترقات التي لا يوجد بها إشارات ضوئية.
• الإشراف على مراكز التاهيل والإصلاح.
• فض الشغب والمشاجرات.


هذا في طبيعة الحال !!


لكن شرطة اليوم غير .. صراحة أول مرة أسمع وأشوف عن شرطة مغازلجية درجة أولى .. يعني اذا مرت وحدة مخالفة وقالها عن المخالفة .. وهي مسكينه حالتها حاله .. واخيـــــرا يقولها لاتضايقين عمرج اخذي رقمي وانا ماراح اخالفج !!


ياســـلام .. والله بصراحه أدى واجبه على أكمل وجه هالشرطي وبيض اللة وجهة !! وواحد اخر يتحرش بجنوس وواحد عند كلية بنات بدال مايحفظ الأمن هناك يرقم أو يدق على ربعه يقولهم أنا ماسك زام بالكلية الفلانيه شرايكم تيون ؟!!

وواحد أخر بدال مايخالف الشباب الطائش اللي يستعرضون بالسيارات داخل المناطق السكنية .. لا الحبيب يترجل من الدورية ويتوجه لهم بابتسامة عريضة >> توقعته بيخالفهم

ولايسلم عليهم وسوالف وضحك وليش ماتسيرون علينا بالديوانية >> اطلعوا من الربع !!

لهدرجة ماكو احترام لزي اللي هو لابسة وشعار البلد ؟؟


هذيل تخرجوا من مصنع الرجال أو مصنع الغزل والهزل والكسل !!

وعلى طاري الكسل شوف عيني واحد راكب بدورية عند نقطة تفتيش لابس جينز وتي شيرت !! في البداية توقعت الموضوع مقلب من الكاميرة الخفية بس طل حقيقة وهذا شرطي !!


وهو مو الجميع جذية .. في بالداخلية رجال أكفاء لايغفى لهم جفن ويأدون واجبهم على أكمل وجه


ونذكر منهم بلال منصور .. هذا الرجل الكفئ والجدير بالاحترام والتقدير

http://www.zoomkw.com/zoom/Article.cfm?ArticleID=90664





وتنتهي ملاقاتي عند هذا الحد أملا اني زرعة الابتسامة في وجوهكم ..


إلى لقاء قريب