[>< ساره ><]

السلام عليكم ،، وتقبل الله طاعتكم

بعد مابدت الفضائيات باستعراض برامجها لاحظنا "الكم الهائل" من الدراما الخليجية هالسّنه !!
وفعلاً لما دخلنا الشهر الكريم لقيت نفسي لاإرادياً اتابع خليجي ،، وخليجي فقط
يعني كل سنه لازم عمل عربي يدخل بس هالسّنه ماقدرت من كميّة الموجود ،،

ومستوى المعروض أقدر الخصه بكلمتين :

!!!! ماتعدو المتوسّط !!!!

وماأشوفهم قدرو يغطون على نجاحهم العام
زوارة خميس ، باب الفرج ، ساهر الليل ! وغيرها وغيرها من الأعمال الحلوة اللي فقدتها وايد هالسّنه وبصراحه أكثر تحسّفت على "بعض" الانتقادات اللي كنت اقولها على هالأعمال مقابل اللي شفته !!

خلونا نعلّق عالموجود :

ساهر الليل 2 :
للأمانه الأول شدنا بزمنه وكان له رونق خاص بس مقارنة بالأحداث اشوف الثاني أفضل من الأول !! شفنا شخوص أكثر وقصص أكثر ،، بالأول حبينا اغاني عبدالحليم وهدوء المسلسل والحب البريئ ،، والثاني شدنا بالممثلين ،

##
##

بوكريم :
من ناحية النجاح الجماهيري "ناجح ومتابع بشكل جيّد" والدليل الناس اللي حوالينا + الاتصالات اللي تيي لبرنامج ايمان نجم !! بس من ناحية فنية اهو ومسلسل أميمة واحد ،،
واضح ان هبه حماده حطّت مجهودها كله بالسرداب اللي تأجل وهالمسلسل ماأعارته اهمية كبيره !!

قصّه خيالية شوي والكاتبه كانت محقّة بالبداية لما كتبت "كلمتها" لأنها تدري بتييلها كمية انتقادات بدت من الحلقة الأولى !! وللأسف في كذا حادثة "مقتبسه" من عدة مصادر ،،

أفضل ما بالمسلسل الحوار : ) والجمل التعبيرية اللي تدش القلب + اداء سعد الفرج المبهررر ،،

##
##

فرصه ثانيه :
للأمانه قصه حلوة وماألوم سعاد عبدالله بصباح الخير ياعرب يوم تقول أفضل قصه مرت علي خلال السنين الأخيره ، ولكن عابها الإخراج !!!

الاخراج وايد تقليدي ، وايد بايخ ، ماكو ابتكار لامن ناحية التصوير ولامن ناحية التشويق !!
يعني لو ماإن سعاد البطله ووداد الكاتبه جان مسحته من قائمتي من اول حلقة

##
##

شوية أمل :
هالمسلسل اللي معلقه عليه أملي برمضان
متحسفه انه موناجح جماهيرياً مع انه عمل متكامل من جميع النواحي ،

قصه حلوة ، اداء ممثلين راقي ، وتشويق يخلينا ننطر الحلقه اللي وراها ،

##
##

علمني كيف أنساك :
نفس ماقتلكم احس اني اتابع فلم عربي بالسبعينات
بارد وايد !! بس يمكن هذي البداية ويتغيّرون عقب مايكبرون البنات !! اداء الهام وآآيد راقي كعادتها وخالد امين وهدى حسين جيّد،،

وبصراحه حسيت شكثر الريّال اناني بهالمسلسل

##
##

الملكه
هالمسلسل تفاجأت فيه حيل !! توقعته شي وصار شي ثاني !!
كان ببالي قصة "مطربه" تبدأ من الصفر لكن تفاجأت انها اساساً مطربه مشهوره وخلاص ،،، وسألت نفسي شالفايده من العمل عيل ؟!

صراخ هدى مزززعج حيل وصرت اقصر عالريموت لاشعورياً اذا بدت تنفعل !! وسالفة النجم الأوحد عند مصر شكلها هدى حسين بتتيناها خليجياً !!! صايره مثل مسلسل "ليلى" ماكو مشهد يمر الا بأمرها !! وطبعاً دايماً اراءها الصج والناس اهم الغلط واهي الوحيدة اللي تفهم وتعرف ،

+ لوكها صفر عالشمال

##
##

الجليب :
للأمانه ماتابعت الــ 7 حلقات كامله !! بس هل معقوله شخص متزوج صارله 20 سنه ليلحين يفكّر بحبيبته القديمه !!
ممكن يطري عليه طيفها بين فترة والثانيه آآما يصير حديث العايله اليومي ( فلانه اكيد بباله ، اكيد يفكّر فيها ) !!!

وشوي مطلعين الوضع فري وعآآدي البنت زمان توقف عند الباب تكلم الشاوي

##
##

سعيد الحظ والفلته تابعت مقتطفات وانصدمت من كمية "الملاقه" اللي فيهم !!

##
##

المتميزين حتى الحلقه السابعة :

1-سعد الفرج اداءه فظيع ومبهر !! لاشعورياً تدمع عيوني عليه بالحلقه ،،
2- الهام الفضاله فاجأتني هالسنه مثل العام ، اول شي خذت دور يدّه بمقابل نجمات كبار يادوب أم وساعات ماترضى بعد !! + اداءها الحلوو مره تنقلب قمة الشر ومرة حنونه وأحسها مظلوومه !
3- حسين المنصور كاركتر اول مره اشوفه فيه ،، وبساهر التاجر المتغطرس !!
4-زهرة عرفات من زمان مبدعه بس هم من زمان مايت بدور قوي مثل شويّة امل ،
5- هبه الدري اللي ماحبيناها تكون مع قروب البنات صارت افضلهم
6- خالد أمين عجبني بفرصه ثانيه لكن ماأعتقد بيحقق صدى كبير مثل زوارة !!
7- هيا عبدالسلام + زينه كرم تقدّم كبيرر بمستواهم هالسّنه ، الأولى تركت ثوب البنت الخجوله والثانيه تمثيلها متحسّن وايد ،
8- صمود بدور بنت هادية وشكلها أقل من المتوسط !! اول مره تاخذه وأشوفه تستاهل الإشادة خصوصاً انها رضت "يجكرونها" برضاها
9- مرام حضور رائع بشوية امل وباهت جداً بفرصه ثانيه !! ومتوسط بساهر ،،

واللي خاب أملي فيهم

1- شجون تفاجأت فيها وايد !! العام كانت تنافس سعاد والهام وتفوقت على كبار النجوم اما هالسّنه صايره كومبارس تردد كلام خواتها !! والأحداث اللي تصيرلها مبنية على خواتها يعني اهي تسوي عشان فلانه ،،

أتمنى يبرز دورها خلال الحلقات اليايه ،، اتمنى

2- العقل + زهرة الخرجي أكثر اثنين متحمسه لظهورهم بساهر !! ولكن هالحماس تلاشى لأنهم طلعو عاديين وأقل من العاديين بعد ،،

3- محمد المنصور ناوي على عمره هالسنه العام ثنيان والحين فالح بس عموماً دور لاجديد فيه !!وكان محتاج ممثل أصغر شوي بالعمر لأني اشوف مافي فرق عن اللي يسميه "أبوه" ويمكن المنصور أكبر منه بعد

##
##

هذي ياجماعه خلاصة مشاهدني لأسبوع بس !!
أكيد رايي بيتغير الاسبوع الياي واللي وراه ،،

أي اضافات بتضيفونها او تعديلات الموضوع موضوعكم

[القدير]

محمد المنصور شكله يبي يصير


"روميو الشاشة الخليجية":d

[بوهادي]

اللي عجبوني

إبراهيم الحساوي : أداء مافي أحلى منه أداء رائع رائع

سعد الفرج: عجبني السنه وايد

مبارك خميس:ممتاز جدا جدا تمثيله يعجبني

أحمد مبارك :ممتاز جدا

وبسسس

تحيـآتي

[قلب النسر]

سعد الفرج : أداء قوي مؤثر يعور القلب خصوصا لما يفتح فمه له طريقة خاصة مميزة بالتعبير والأداء الشكلي الذي يقنعك انك تشوف بكاء حقيقي على الحدث والموقف .
حياة الفهد : عكس سعد الفرج كثيرة البكاء وعلى شغلة واحدة فقط وعلى غير سنع (ماله داعي ) وهو حبيبها من ربع قرن الذي لاندري ربما يتوفى في نص أو نهاية الحلقة فيكون البكاء عليه بشكل أكبر وربما لاتدري عنه ماصار حب كبرنا والمسلسل بينتهي والبكاء في استمرار

هؤلاء الفنانين هم الأهم للحديث عنهم

برنامج صادوه كل من يعمل فيه يلعبون على عقلية المشاهد وبرنامج ماعنده عند جدتي على قولة اهلنا بالسعودية .

[محمد العيدان]

بصراحة هالسنة تفوق سعد الفرج على الكل

[الصراحة]

من الرواد المتفوق عندي : حياة الفهد - حسين المنصور - سعاد عبدالله تمثيلها احسن من الثلاث سنين اللي طافو
وبخصوص هبة الدري وقروب البنات طبعا هبة الدري افضل عنهم في كل شي و هبة شلت نص مسلسل خيوط ملونة على كتفها اعتقد لو شجوناو فاطمة او غيرها من جروب البنات ما تشل ربع مسلسل بروحا

[بحر الحب]

نسمي باسم الله ونفسر جمومنا ونعلق على جزئيات الموضوع ..

وماأشوفهم قدرو يغطون على نجاحهم العام
زوارة خميس ، باب الفرج ، ساهر الليل ! وغيرها وغيرها من الأعمال الحلوة اللي فقدتها وايد هالسّنه وبصراحه أكثر تحسّفت على "بعض" الانتقادات اللي كنت اقولها على هالأعمال مقابل اللي شفته !!

تقصدين "أيام الفرج" .. فعلا مسلسلات هذا العام لو جمعنا الناجح والمتميز منها .. كلهم ما اشوفهم يوصلون الى مستوى مسلسل واحد من المسلسلات الثلاثة المتميزة في 2010
هذي السنة كانت فرصة كبيرة للدراما الخليجية لاثبات نفسها مع تراجع الانتاج المصري والسوري بسبب الثورات .. لكن للاسف واضح ان الفرصة ضاعت
ولو كانت هالفرصة في 2010 لكانت الدراما الخليجية الاولى عربيا وقتها

ساهر الليل 2 :

للأمانه الأول شدنا بزمنه وكان له رونق خاص بس مقارنة بالأحداث اشوف الثاني أفضل من الأول !! شفنا شخوص أكثر وقصص أكثر ،، بالأول حبينا اغاني عبدالحليم وهدوء المسلسل والحب البريئ ،، والثاني شدنا بالممثلين ،

ساهر الليل في جزءه الاول نقلة نوعية في تاريخ الدراما الكويتية , في جزءه الثاني مسلسل ممتاز جدا

يعيبه بعض الاخطاء "البسيطة" في الملابس والاكسسوارات الغير مناسبة للثمانينات

بوكريم :

من ناحية النجاح الجماهيري "ناجح ومتابع بشكل جيّد" والدليل الناس اللي حوالينا + الاتصالات اللي تيي لبرنامج ايمان نجم !! بس من ناحية فنية اهو ومسلسل أميمة واحد ،،
واضح ان هبه حماده حطّت مجهودها كله بالسرداب اللي تأجل وهالمسلسل ماأعارته اهمية كبيره !!

قصّه خيالية شوي والكاتبه كانت محقّة بالبداية لما كتبت "كلمتها" لأنها تدري بتييلها كمية انتقادات بدت من الحلقة الأولى !! وللأسف في كذا حادثة "مقتبسه" من عدة مصادر ،،

أفضل ما بالمسلسل الحوار : ) والجمل التعبيرية اللي تدش القلب + اداء سعد الفرج المبهررر ،،

أختلف معاج على مستوى العمل من الناحية الفنية ..
شخصيا توقعت ان العمل راح يكون من مستوى "اميمة" ان لم يكن اسوء
لكن بدء رايي يتغير تدريجيا ابتداء من اعلانات المسلسل انتهاء بالسبع حلقات اللي شاهدتها من العمل
اميمة كان عمل تجميعي للبنات وقصة عادية مملة , اما بوكريم مسلسل انساني جدا في القصة والحوار واداء الممثلين

تقريبا منذ ظهور ليلى سلمان بالعمل , بدءت عجلة البطء تسيطر على العمل .. وهبة و"عيبها الازلي" وهو المبالغات اللي ما تدش المخ حتى وان كان العمل خيالي كما هو ذكرها في مقدمة الحلقة الاولى

وبالنسبة للخيال .. كنت قبل ايام في نقاش مع احد الاقارب عن الخيال والواقع في الدراما , قالي بأن اللي يكتب قصة واقعية ومن الواقع لا يعتبر مؤلف لانه يوثق شيء من الواقع فقط لا غير ,, اما من يكتب قصة خيالية مثل هبة حمادة فهذا فعلا من يطلق عليه مؤلف وكاتب .. وانا اقتنعت بوجهة نظره

فرصه ثانيه :

للأمانه قصه حلوة وماألوم سعاد عبدالله بصباح الخير ياعرب يوم تقول أفضل قصه مرت علي خلال السنين الأخيره ، ولكن عابها الإخراج !!!

الاخراج وايد تقليدي ، وايد بايخ ، ماكو ابتكار لامن ناحية التصوير ولامن ناحية التشويق !!
يعني لو ماإن سعاد البطله ووداد الكاتبه جان مسحته من قائمتي من اول حلقة

باعتقادي حتى لو تسلم المقلة اخراج العمل .. ماراح يكون افضل من علي العلي

المقلة حماسه للاخراج والعمل قل بشكل غريب جدا !!
من بعد روائع مثل ( نيران ) و ( يوم آخر ) وصل مستواه الى اعمال مثل ( بنات آدم ) و ( سماء ثانية ) !!
و ( سماء ثانية ) عمله لهذا العام .. اتباعه هذه الايام , اخراج عادي جدا ومسلسل عادي ووجوه مكررة في اعماله واداء الاغلبية عادي

وبالنسبة لـ ( فرصة ثانية ) .. عندي شعور بأن الحدث المهم بالعمل انتهى !! وهو ان عبدالعزيز جاسم يصحى من غيبوبته !!
وباقي احداث المسلسل حتى الحلقة الاخيرة مجرد استعراض لحياة تركي من بعد الغيبوبة

وداد قلمها بالفترة الاخيرة ممل وخالي من المفاجآت

شوية أمل :

هالمسلسل اللي معلقه عليه أملي برمضان
متحسفه انه موناجح جماهيرياً مع انه عمل متكامل من جميع النواحي ،

قصه حلوة ، اداء ممثلين راقي ، وتشويق يخلينا ننطر الحلقه اللي وراها ،

مسلسل ممتاز جدا .. من قصة واخراج واداء ممثلين
نجاحه الغير جماهيري يذكرني بـ ( ايام الفرج 2010 )

الملكه

هالمسلسل تفاجأت فيه حيل !! توقعته شي وصار شي ثاني !!
كان ببالي قصة "مطربه" تبدأ من الصفر لكن تفاجأت انها اساساً مطربه مشهوره وخلاص ،،، وسألت نفسي شالفايده من العمل عيل ؟! :d

صراخ هدى مزززعج حيل وصرت اقصر عالريموت لاشعورياً اذا بدت تنفعل !! وسالفة النجم الأوحد عند مصر شكلها هدى حسين بتتيناها خليجياً !!! صايره مثل مسلسل "ليلى" ماكو مشهد يمر الا بأمرها !! وطبعاً دايماً اراءها الصج والناس اهم الغلط واهي الوحيدة اللي تفهم وتعرف ،

+ لوكها صفر عالشمال

أقدر أقول بانه مسلسل مخيب للامال جدا !!
اخراج قوي ممثل ممتازين .. لكن قصة عادية
لو كانت شخصية هدى دكتورة او مهندسة او مدرسة او ...الخ , لكانت 80% من احداث المسلسل ما راح تتغير
لانها مالها علاقة بالملكة وعالمها
وهذا دليل على سطحية المسلسل

الجليب :

للأمانه ماتابعت الــ 7 حلقات كامله !! بس هل معقوله شخص متزوج صارله 20 سنه ليلحين يفكّر بحبيبته القديمه !!
ممكن يطري عليه طيفها بين فترة والثانيه آآما يصير حديث العايله اليومي ( فلانه اكيد بباله ، اكيد يفكّر فيها ) !!!

وشوي مطلعين الوضع فري وعآآدي البنت زمان توقف عند الباب تكلم الشاوي

إن صح القول .. فـ ( الجليب ) هو أفضل اعمال حياة الفهد من بعد سقطاتها الخمس اللي بدأت مع "عمر الشقا" وانتهت مع "خارج الاسوار"

بالنسبة لقصة الحب بين صلاح وحياة .. امس في برنامج (سرى الليل) متصل علق على هذه الناحية وقال بان دور حياة الفهد صغير عليها ولو احضرت ممثلة اخرى لخدمت القصة
حياة للاسف لم تحسن اختيار الممثلة الصغيرة اللي جسدت دورها لانها كانت اصغر من عمر الدور , ودورها الحالي صغير عليها خاصة ان حضورها اصبح عادي وعمليات (الشد والجذب) اثرت على ملامحها وبالتالي فقدت هيبة ادائها للاسف !!

وفعلا هناك ملاحظات على العمل مثل وقوف هند على الباب في كل حلقة

ولي عودة للتعليق على الممثلين

[بحر الحب]

عودة ..

1-سعد الفرج اداءه فظيع ومبهر !! لاشعورياً تدمع عيوني عليه بالحلقه ،،

بوكريم هو افضل دوره قدمه سعد الفرج بالعشرين سنة الاخيرة وبعده دوره في ( الدروزاة ) وفيلم ( سدرة )
بلا شك اداءه رائع ومؤثر جدا وافضل بمراحل من عبدالعزيز جاسم لو كان هو من مثل الدور

- الهام الفضاله فاجأتني هالسنه مثل العام ، اول شي خذت دور يدّه بمقابل نجمات كبار يادوب أم وساعات ماترضى بعد !! + اداءها الحلوو مره تنقلب قمة الشر ومرة حنونه وأحسها مظلوومه !

فعلا تركيبة دورها غريبة بين الخير والشر .. وابدعت في اداء الدور خصوصا من ناحية النظرات وطريقة القاء الحوار

3- حسين المنصور كاركتر اول مره اشوفه فيه ،، وبساهر التاجر المتغطرس !!

2008 كانت سنة هدى حسين في ( فضة , عيون الحب ) و 2010 كانت سنة خالد أمين في ( زوارة الخميس , أيام الفرج )
و 2011 اتوقع بأنها سنة حسين المنصور بدورين رائعين ومتناقضين في ( فرصة ثانية , ساهر الليل 2 )

4-زهرة عرفات من زمان مبدعه بس هم من زمان مايت بدور قوي مثل شويّة امل

دور العمر بالنسبة لها مع ابراهيم الحساوي ..

آخر دور مميز لزهرة كان في ( يوم آخر 2003 ) او ( نعم ولا 2007 ) تقريبا !!

5- هبه الدري اللي ماحبيناها تكون مع قروب البنات صارت افضلهم

أيضا هبة فترة طويلة وادوارها سيئة جدا .. آخر دور مميز لها تقريبا في ( الخراز 2007 )

6- خالد أمين عجبني بفرصه ثانيه لكن ماأعتقد بيحقق صدى كبير مثل زوارة !!

من أول مشهد في ( زوارة الخميس ) كان اداء خالد شيء عظيم جدا !!

في ( فرصة ثانية ) اداء رائع لكن لا يصل الى الاداء الاسطوري اللي قدمه في ( زوارة الخميس )

7- هيا عبدالسلام + زينه كرم تقدّم كبيرر بمستواهم هالسّنه ، الأولى تركت ثوب البنت الخجوله والثانيه تمثيلها متحسّن وايد ،

ادائهم بالنسبة لي عادي جدا ..

هيا لاتزال خجولة من الكاميرا حتى وان كان دورها مشاغبة ..

وزينة اداءها كانها تسمع الحوار للمشاهدين في بعض المشاهد

8- صمود بدور بنت هادية وشكلها أقل من المتوسط !! اول مره تاخذه وأشوفه تستاهل الإشادة خصوصاً انها رضت "يجكرونها" برضاها

9- مرام حضور رائع بشوية امل وباهت جداً بفرصه ثانيه !! ومتوسط بساهر ،،

أتفق معاج عليهم ..

2- العقل + زهرة الخرجي أكثر اثنين متحمسه لظهورهم بساهر !! ولكن هالحماس تلاشى لأنهم طلعو عاديين وأقل من العاديين بعد ،،

العقل وزهرة بالنسبة لي انتهوا للأبد !!

قمة الاصطناع بادائهم وصاروا يفتقرون الى ابسط شيء وهو قبول المشاهد !!

- محمد المنصور ناوي على عمره هالسنه العام ثنيان والحين فالح بس عموماً دور لاجديد فيه !!وكان محتاج ممثل أصغر شوي بالعمر لأني اشوف مافي فرق عن اللي يسميه "أبوه" ويمكن المنصور أكبر منه بعد

بــــــــارد جدا جدا ..

اداء مبارك خميس والحساوي بنفس العمل كان افضل ..
محمد المنصور من بعد ( أسد الجزيرة ) اداءه في اغلب الادوار اصبح جدا بارد
حتى في اغلب مشاهد ( زوارة الخميس )
حاليا برأيي : حسين هو الافضل من بين عيال المنصور

وكل الشكر لج سارة على الموضوع الكبير والجميل

تقبلي مروري

[ابو عبدالمحسن]

انا ما اقدر اقول شيء بعد اللي قلتوه بس عندي ملاحظه دقيقه جدا وكل اللي ردوا ما قالوها الا وهي مسلسل الدخيله مافي احد علق على هذا المسلسل الرائع !!!!!